Украинадаги Озарбайжон элчихонаси яқинида Россия ракетаси қулаб тушди (видео)

Бугун, 28 августга ўтар кечаси Россия томонидан тунги ҳужумда учирилган ракеталардан бири Киевда жойлашган Озарбайжон элчихонасидан атиги 100 метр нарига қулаб тушди. Бу ҳақда украиналик журналист Денис Казанский Telegram-каналида хабар берди.

Журналист ўз постида Россияни Озарбайжон дипломатик ваколатхонасига қарши бевосита ҳужум уюштиришда айблаб, бу воқеани “очиқчасига террорчилик ҳаракати” деб атаган. 

Маълум қилинишича, элчихона яқинига қулаган ракета портлагандан кейин ёнғин келиб чиққан. Журналист ушбу ракета портлаши ортидан қанча одам жароҳат олгани-ю, ҳалок бўлгани ҳақида маълумот келтирмаган. 

Портлаш ҳақида Озарбайжон ОАВлари ҳам хабарлар тарқатган. Россия эса ҳеч нарсадан хабари йўқдек расмий маълумот ёки муносабат билдирмаган. 

Умуман олганда, портлаш Озарбайжон элчихонаси яқинида илк бор рўй бермаяпти. Жорий йилнинг июль ойларида – Озарбайжон билан Россия орасидан ола мушук ўтганидан сўнг ҳам элчихона яқинидаги ҳудудга ракета ташланган эди. Жорий портлашни ҳам кўпчилик Озарбайжон раҳбари Илҳом Алиевнинг Россияга қарши қаратилган баёнотлари билан боғламоқда. Алиев яқиндагина “Al Arabiya” нашрига берган интервьюсида Россия билан муносабатларнинг ёмонлашуви учун масъул эмаслиги ва ҳеч қачон тажовуз ёки ҳурматсизлик белгиларига чидамаслигини таъкидлади.

Бундан ташқари, Россия кучлари Украинадаги Озарбайжонга тегишли энергетика объектларини ҳам бир неча бор нишонга олган.

Эслатиб ўтамиз, бугун, 28 августга ўтар кечаси Россия Украина ҳудудига бир нечта ракеталар йўллаганди. Россиянинг Киевни ўққа тутиши оқибатида тўрт киши, жумладан, 14 ёшли бола ҳалок бўлди, яна 30 га яқин киши жароҳатланди.