Лондон Украинага юбориладиган қўшин учун 230 млн евро ажратди

Буюк Британия қўшинларини Украинага жойлаштириш мақсадида Британия Қуролли кучларини янги ускуналар билан жиҳозлаш учун 230 миллион евро ажратади. Бу ҳақда кеча, 9 январь куни мамлакат Мудофаа вазирлиги хабар берди.

Келтирилишича, маблағлар Британия Қуролли кучларини янги ускуналар билан жиҳозлаш, транспорт воситаларини, алоқа тизимларини модернизация қилиш ва дронлардан ҳимоя қилиш учун мўлжалланган.

Жорий йил 6 январь куни Киев, Париж ва Лондон Парижда бўлиб ўтган “Кўнгиллилар коалицияси” учрашувида декларация имзолаган. Буюк Британия Бош вазири Кир Стармернинг айтишича, ушбу ҳужжат сулҳдан сўнг Украинада Британия, Франция ва бошқа “ҳамкор” давлатлар қўшинларини жойлаштириш учун “ҳуқуқий асос” яратади.

Британия ҳукумати раҳбари, шунингдек, ўт очишни тўхтатиш режими бошланганидан кейин Буюк Британия ва Франция Украина бўйлаб “ҳарбий марказлар” ташкил этишини ҳамда қурол-аслаҳа ва ҳарбий техникани сақлаш учун “ҳимояланган объектлар” барпо этишини маълум қилган.

Шунингдек, Англия ва Франция Россия билан тинчлик шартномасидан сўнг хавфсизлик кафолати сифатида Украинага 15 мингтагача аскар юборишни режалаштирмоқда. Германия эса Украина яқинида қўшинларни жойлаштиришга тайёрлигини билдирган.

Маълумот ўрнида, Россия Ташқи ишлар вазирлиги вакили Мария Захарова аввалроқ Украинада хорижий қўшинлар ва ҳарбий иншоотларнинг жойлаштирилиши Россия томонидан ўз хавфсизлигига тўғридан тўғри таҳдид сифатида кўриб чиқилишини маълум қилганди. Унинг қўшимча қилишича, “бундай бўлинмалар ва иншоотлар Россия армияси томонидан қонуний жанговар нишонлар ҳисобланади”.

Эслатиб ўтамиз, аввалроқ Россия Парижда бўлиб ўтган “Кўнгиллилар коалицияси”нинг йиғилишига биринчи марта жавоб қайтаргани ҳақида хабар берилганди.