Трамп Аляскадан қайтаётганда Зеленский билан узоқ гаплашди

АҚШ Президенти Дональд Трамп Аляскадан қайтаётганда украиналик мавқедоши Владимир Зеленский билан узоқ суҳбатлашди. Бу ҳақда Оқ уй матбуот котиби Кэролайн Ливитт маълум қилди.  

Трамп Россия Президенти Владимир Путин билан саммити якунлангандан сўнг маҳаллий вақт билан эрталаб соат 2 дан кейин Мэриленд штатидаги Эндрю қўшма базасига қўнди. Ливиттнинг сўзларига кўра, Президент олти соатлик парвознинг катта қисмини телефонда ўтказган. 

“Зеленский билан телефон суҳбатидан кейин Трамп НАТО билан гаплашди”, деди у.

Икки ярим соат давом этган учрашувдан сўнг Путин билан қўшма матбуот анжуманида Трамп Зеленский ва НАТО расмийлари билан телефон орқали мулоқот қилишга ваъда берганди. 

“Мен, албатта, Президент Зеленскийга қўнғироқ қиламан ва унга бугунги учрашув ҳақида айтиб бераман”, деганди Трамп конференция чоғида.

Зеленскийнинг идораси унинг Трамп билан бугун, 16 август куни эрталаб гаплашганини тасдиқлади.

Президент Дональд Трамп Аляскада Путин билан суҳбатдан кейин “Fox News” телеканалига қисқа интервью беришга ҳам улгурди. У Украина Президенти Владимир Зеленский зиммасига ўт очишни тўхтатиш бўйича музокаралар олиб бориш масъулиятини юклаб, Зеленский ва Путин ўртасида тез орада учрашув бўлиб ўтишини айтди.

“Ҳозир буни амалга ошириш ҳақиқатан ҳам Президент Зеленскийга боғлиқ. Улар энди Президент Зеленский, Президент Путин ва менинг иштирокимда учрашув ташкил этишади, шекилли”, деди Трамп.

Суҳбат чоғида Трамп келишувни давом эттираётган якуний масалаларни батафсил баён этишдан бош тортди ва фақат “нима қилишимиз мумкинлигини кўришни” истаётганини айтди. Кеча келишувга эриша олмаганига қарамай, у саммитни муваффақиятли ўтганини таъкидлаб, Путин билан “яхши тил топишгани маъносида” учрашувни 10 баллдан 10 баллга баҳолади.

“Мен бу амалга ошишига ишонч ҳосил қилмоқчиман. Ва бизда буни амалга ошириш учун жуда яхши имконият бор”, дея қўшимча қилди у.

Эслатиб ўтамиз, кеча Россия ва АҚШ Президентлари Владимир Путин ва Дональд Трамп Аляскада учрашди. Учрашувда Россия Ташқи ишлар вазири Сергей Лавров, Президент ёрдамчиси Юрий Ушаков, АҚШ Давлат котиби Марко Рубио ва махсус элчи Стив Уиткофф ҳам иштирок этди. Музокаралар 2 соат 45 дақиқа давом этди.

Президентлар матбуот олдида қисқа баёнот берди, шундан сўнг учрашув якунланди. Трампнинг айтишича, келишувга эришилмаган, бироқ икки томон ҳам музокараларни конструктив ва фойдали деб баҳолади.