Трамп-Путин музокараларига Туркия ҳам мезбон бўлиши мумкин

Кеча, 7 август куни Туркия Ташқи ишлар вазири Хоқон Фидан Россия Ташқи ишлар вазири Сергей Лавров билан телефон орқали суҳбатлашди. Бу ҳақда “Коммерсантъ” хабар берди.

Қайд этилишича, улар ўзаро суҳбатда АҚШ Президенти Дональд Трамп ва Россия раҳбари Владимир Путиннинг яқин орадаги суҳбатини Туркия ҳудудида ўтказишни муҳокама қилган. 

Суҳбатда қандай турдаги мулоқотлар назарда тутилгани очиқланмаган бўлса-да, бу таклиф муҳим дипломатик ташаббус сифатида қайд этилган. Айтиш жоизки, Туркия Президенти Ражаб Тойиб Эрдўған илгари ҳам Россия ва АҚШ раҳбарлари ўртасида икки томонлама учрашувни Истанбулда ўтказишни таклиф қилган эди. 

РИА Новости‘га нашрига кўра, суҳбат давомида Россия ва Украина ўртасидаги музокараларнинг долзарб ҳолати ҳам муҳокама қилинган.

Ушбу воқеалар фонида Россия Президентининг ёрдамчиси Юрий Ушаков Россия ва АҚШ Президентлари учрашуви бўйича жой аллақачон келишилганини маълум қилди. Трамп эса, ўз навбатида, “жуда яқин кунларда” Путин билан музокаралар ўтказишни режалаштираётганини айтди. Ушаковга кўра, бу учрашув 11–17 август оралиғида бўлиши мумкин. Аниқ жой эса кейинроқ эълон қилинади. Туркиядан ташқари, Сербия ва Швейцария ҳам саммитга мезбонлик қилишга тайёрлигини билдирган, шунингдек, Саудия Арабистони, БАА, Қатар ва Ватикан ҳам номзод сифатида кўрилмоқда.

Эслатиб ўтамиз, аввалроқ Владимир Путин Украина Президенти Владимир Зеленский билан учрашув ўтказишга қарши эмаслигини билдирганди, бироқ бунинг учун муайян шарт-шароитлар бўлиши кераклигини таъкидлаганди. Шунингдек, Путин АҚШ Президенти Дональд Трамп билан учрашув бўйича ҳам маълумот берган. Кремль хабарига кўра, Россия ва АҚШ томонлари Путин ва Трамп ўртасидаги учрашувни келаси ҳафтага режалаштирган. Учрашув ўтказилиши мумкин бўлган жой ҳақида саволга жавобан Путин журналистларга Бирлашган Араб Амирликларини “мос жой” сифатида кўрсатган.