Германия Президенти АҚШ жаҳон тартибини бузаётганини айтди

Германия Президенти Франк-Вальтер Штайнмайер АҚШ Президенти Дональд Трамп давридаги мамлакат ташқи сиёсатини кескин танқид қилди ва дунёни глобал тартибнинг “қароқчилар уяси”га айланиб кетишига йўл қўймасликка чақирди. Бу ҳақда у кеча, 7 январь куни симпозиумдаги чиқишида сўз очди.

Кескин баёнот Венесуэла президенти Николас Мадуронинг АҚШ томонидан ағдарилишига ишора ўлароқ янграган. Германиянинг собиқ ташқи ишлар вазири бўлган Штайнмаернинг айтишича, глобал демократия олдин кузатилмаган даражада ҳужум остида қолмоқда.

“Reuters”нинг ёзишича, гарчи Германия Президентининг роли рамзий бўлса-да, унинг сўзлари муайян сиёсий вазнга эга ва у амалдаги сиёсатчиларга нисбатан ўз фикрини эркинроқ билдира олади.

Қримнинг Россия томонидан қўшиб олиниши ва Украинадаги ҳарбий ҳаракатларни тарихий бурилиш нуқтаси деб атаган Штайнмаер АҚШнинг ҳозирги хатти-ҳаракатларини иккинчи йирик тарихий узилиш сифатида баҳолаган.

“Бундан ташқари, ушбу жаҳон тартибини барпо этишда ёрдам берган энг муҳим ҳамкоримиз – АҚШ томонидан қадриятларнинг емирилиши содир бўлмоқда. Масала шундаки, дунёнинг қароқчилар уясига айланишига йўл қўймаслик керак: энг бешафқат кучлар ҳамма нарсани ўз хоҳишига кўра тортиб оладиган, бутун минтақалар ёки ҳатто мамлакатлар бир нечта йирик давлатларнинг мулки сифатида қараладиган ҳолатга йўл қўйиб бўлмайди”, дейди у.

Штайнмайернинг сўзларига кўра, хавфли вазиятларда фаол аралашув зарур ва Бразилия ҳамда Ҳиндистон каби давлатларни жаҳон тартибини ҳимоя қилиш муҳимлигига ишонтириш керак.

Эслатиб ўтамиз, аввалроқ Хитой Халқ Республикаси Раиси Си Цзиньпин Ирландия Бош вазири билан учрашув чоғида бир томонлама қўрқитиш халқаро тартибни жиддий равишда издан чиқарганини, барча мамлакатлар халқаро ҳуқуқ ва БМТ низомига амал қилиши кераклигини айтган эди.