Путин Зеленский билан учрашишга қарши эмас, аммо...

Россия Президенти Владимир Путин Украина Президенти Владимир Зеленский билан учрашув ўтказишга қарши эмаслигини билдирди, бироқ бунинг учун муайян шарт-шароитлар бўлиши кераклигини таъкидлади. Бу ҳақда у бугун, 7 август куни БАА Президенти Шайх Муҳаммад бин Зоид Ол Наҳаён билан учрашувдан сўнг журналистларнинг саволларига жавоб бериш чоғида айтиб ўтди. 

Путиннинг сўзларига кўра, у Зеленский билан учрашувга “умуман қарши эмас” ва бундай учрашув “кутилиши мумкин”, аммо бунинг учун “муайян шартлар яратилиши керак”. Айни пайтда эса “бу шартларнинг амалга ошишига ҳали анча вақт бор”. 

Шунингдек, Путин АҚШ Президенти Дональд Трамп билан учрашув бўйича ҳам маълумот берган. Кремль хабарига кўра, Россия ва АҚШ томонлари Путин ва Трамп ўртасидаги учрашувни келаси ҳафтага режалаштирган. Учрашув ўтказилиши мумкин бўлган жой ҳақида саволга жавобан Путин журналистларга Бирлашган Араб Амирликларини “мос жой” сифатида кўрсатган.

Трамп ҳам 6 август куни Путин ва АҚШнинг махсус вакили Стив Уиткофф билан бўлиб ўтган музокаралардан сўнг, Россия раҳбари билан учрашув имконияти мавжудлигини айтганди. Шунингдек, у Россия, Украина ва АҚШ Президентлари ўртасида уч томонлама саммит бўлиш эҳтимолини ҳам тилга олган. Уиткофф учрашувда Зеленский иштирокини ҳам кўтариб чиққан, бироқ Кремль вакили Юрий Ушаков бу мавзу ҳақида аниқ маълумот йўқлигини билдирган. 

Эслатиб ўтамиз, 6 август куни Россия раҳбари Уиткоффни Кремлда қабул қилганди. Учрашув тахминан уч соат давом этган. Кремль матбуот хизмати учрашув тафсилотларини очиқламади. Россия Президентининг ёрдамчиси Юрий Ушаков эса Владимир Путин Дональд Трампнинг махсус вакили Уиткофф билан учрашуви чоғида Оқ уй раҳбарига Украинадаги можарони ҳал этиш бўйича бир нечта сигналлар юборганини айтганди.