Трамп ва Путин бир-бири билан учрашишга тайёр – Оқ уй

Россия Президенти Владимир Путин АҚШ махсус вакили Стив Уиткоффга америкалик мавқедоши Дональд Трамп билан учрашмоқчи эканини айтди. Бу ҳақда Оқ уй матбуот котиби Кэролайн Ливитт маълум қилди.

Унинг сўзларига кўра, Трамп ҳам Владимир Путин, ҳам Украина Президенти Владимир Зеленский билан учрашишга очиқ. Ливиттнинг қайд этишича, Трамп ва Путиннинг учрашуви “эҳтимоли жуда катта”.

“Президент Трамп бугун Truth Social платформасида айтганидек, махсус вакил Уиткофф ва Президент Путин ўртасидаги учрашувда сезиларли ютуқларга эришилди. Россия томони Президент Трамп билан учрашиш истагини билдирди ва Президент ҳам Президент Путин, ҳам Президент Зеленский билан учрашишга тайёрлигини билдирди”, деди Оқ уй воизи.

Ливитт айтганидек, АҚШ Президенти Truth Social платформасида пост қолдириб, Уиткоффнинг Путин билан учрашувини “ўта самарали” деб атади. 

“Ажойиб натижа! Музокаралар якунида мен Европадаги баъзи иттифоқчиларимиз ҳақида маълумот бердим. Ҳамма бу уруш тугаши керак, деган фикрга қўшилади ва биз буни яқин кунлар ва ҳафталарда кутамиз”, деб ёзди Трамп.

“The New York Times” вазиятдан хабардор икки манбага таяниб, Трамп Путин ва Зеленский билан шахсий учрашувни режалаштираётгани ҳақида хабар берди. Хабарда айтилишича, Трамп Путиннинг Уиткофф билан Москвадаги учрашувидан кейин Европа етакчилари билан музокаралар чоғида Путин ва Зеленский билан учрашиш истагини билдирган. Нашр маълумотларига кўра, Трамп келаси ҳафта Путин билан учрашишни, кейин эса Зеленский билан уч томонлама учрашув ўтказишни режалаштирмоқда.

Украина Президенти Владимир Зеленский ҳам америкалик мавқедоши Дональд Трамп билан телефон суҳбатига изоҳ берди.

“Суми вилоятидаги бригадаларимиздан кетаётиб, мен Президент Трамп билан суҳбатлашдим. Бу суҳбат Президент Трампнинг вакили Стивен Уиткоффнинг Москвага ташрифидан сўнг бўлиб ўтди. Бизнинг шерикларимиз билан умумий позициямиз мутлақо аниқ: уруш тугаши керак. Ва бу адолатли якун бўлиши керак. Суҳбатда Европа етакчилари ҳам иштирок этди ва уларнинг ҳар биридан қўллаб-қувватлаганликлари учун миннатдорман. Биз Москвада нима эълон қилинганини муҳокама қилдик”, деб ёзди Украина раҳбари ўзининг Telegram-каналида.

Хабар қилинишича, музокараларда Буюк Британия Бош вазири Кир Стармер, Германия канцлери Фридрих Мерц ва НАТО Бош котиби Марк Рютте иштирок этган.