Трамп ва фон дер Ляйен Россия ҳамкорларини бож билан жазолашни муҳокама қилди

АҚШ Президенти Дональд Трамп ва Еврокомиссия раҳбари Урсула фон дер Ляйен 27 июль куни Шотландияда бўлиб ўтган музокаралар чоғида Россиянинг савдо ҳамкорларига нисбатан АҚШнинг 100 фоизлик тарифларини жорий этиш муддатларини қисқартириш масаласини муҳокама қилди. Бу ҳақда бугун, 29 июль куни Брюсселда бўлиб ўтган брифингда Еврокомиссия матбуот котиби Стефан Де Кеерсмакер маълум қилди.

“Ҳа, бу масала маслаҳатлашувлар чоғида кўтарилди”, деди у АҚШ томонидан Европа Иттифоқига ваъда қилинган тарифларни пасайтириш бўйича музокаралар чоғида Трамп ва фон дер Ляйен Россиянинг савдо ҳамкорларига нисбатан АҚШ божларини жорий этишни тезлаштириш масаласини муҳокама қилгани ҳақидаги саволга жавоб бераркан.

Трамп аввалроқ Россия ва Украинага келишувга эришиш учун 50 кун беришини, шундан сўнг Москва ва унинг савдо ҳамкорларига қарши 100 фоизлик савдо тарифларини жорий этиш ниятида эканини айтган эди.

Бироқ кеча, 28 июль куни Америка етакчиси Россия ва можарони ҳал қилишда эришилган ютуқлардан ҳафсаласи пир бўлганини ва шу боис муддатни 10-12 кунга қисқартирганини айтди.

Бундан ташқари, Трамп Россия Президенти Владимир Путин билан энди гаплашишдан манфаатдор эмаслигини айтди, бироқ қандай алоқалар ва қайси мавзуни назарда тутганини тушунтирмади.

Россия Президентининг матбуот котиби Дмитрий Песков шундан сўнг Кремль Трампнинг баёнотини “эътиборга олгани” ва можарони тинч йўл билан ҳал этиш тарафдори эканини, бироқ Россия ўз манфаатларини ҳимоя қилиш учун урушни давом эттиришини айтди.

Эслатиб ўтамиз, 27 июль куни АҚШ Евроиттифоқ билан савдо битими тузганди. Унга кўра, Евроиттифоқ АҚШдан 750 миллиард долларлик энергия ресурсларини харид қилишга ва АҚШ иқтисодиётига яна 600 миллиард доллар сармоя киритишга рози бўлган. Шунингдек, Брюссель “жуда катта миқдорда” ҳарбий техника харид қилади. Келишув доирасида АҚШ Евроиттифоқдан келадиган импортнинг катта қисмига, жумладан, автомобилларга 15 фоизлик бож жорий қилади.