Илон Маск яна 7500 та сунъий йўлдош учиради

Кеча, 9 январь куни АҚШ Федерал алоқа комиссияси (ФАК) SpaceX компаниясининг бутун дунё бўйлаб интернет хизматини яхшилаш мақсадида яна 7500 та иккинчи авлод Starlink сунъий йўлдошларини жойлаштириш ҳақидаги илтимосини маъқуллаганини маълум қилди.

ФАК маълумотларига кўра, Илон Маскнинг SpaceX компанияси энди қўшимча 7500 та Gen2 Starlink сунъий йўлдошларини бошқариши мумкин, бу билан унинг сунъий йўлдошлари сонини 15000 тага етказади. ФАК шунингдек, SpaceX’га сунъий йўлдошларни янгилашга ва бешта частотада ишлашга рухсат берган.   
 
Агентликка кўра, қўшимча сунъий йўлдошлар Қўшма Штатлардан ташқарида тўғридан тўғри уяли алоқа ва қўшимча АҚШ қамровини таъминлайди, бу эса кейинги авлод мобил хизматларини, шунингдек, секундига 1 гигабитгача интернет тезлигини кафолатлайди.

“15 000 та янги ва илғор сунъий йўлдошларга рухсат бериш орқали ФАК SpaceX’га мисли кўрилмаган сунъий йўлдош кенг полосали уланиш имкониятларини тақдим этиш, рақобатни кучайтириш ва ҳеч бир жамоа ортда қолмаслигини таъминлашга ёрдам бериш учун яшил чироқ берди”, дейди ФАК раиси Брендан Карр
  
SpaceX қарийб 30 000 та сунъий йўлдошни жойлаштириш учун рухсат сўраган, аммо ФАК ҳозирча фақат 15 000 тасини тасдиқлаган.

“Биз қўшимча сунъий йўлдошларга рухсат бериш жамоатчилик манфаатларига мос келишини аниқладик, гарчи Gen2 Starlink Upgrade сунъий йўлдошлари орбитада синовдан ўтказилмаган бўлса ҳам. Биз қолган 14 988 та таклиф қилинган Gen2 Starlink сунъий йўлдошларига, жумладан, 600 километрдан юқори масофаларда фойдаланиш учун таклиф қилинган сунъий йўлдошларга рухсат беришни кейинга қолдирамиз”, дейилади ФАК хабарида.

SpaceX рухсат этилган Gen2 сунъий йўлдошларининг максимал сонининг 50 фоизини учириши, уларни белгиланган орбиталарга жойлаштириши ва 2028 йил 1 декабрдан кечиктирмай уларни бошқариши керак. SpaceX эса қолган сунъий йўлдошларни 2031 йил декабрига қадар учириши лозим. Шунингдек, у 2027 йил ноябрь ойи охирига қадар 7500 та биринчи авлод сунъий йўлдошларини жойлаштиришни якунлаши керак.

Январнинг илк ҳафтасида Starlink космик хавфсизликни ошириш мақсадида 2026 йил давомида орбитада тахминан 550 км масофада ҳаракатланадиган барча сунъий йўлдошларини 480 километргача тушириш орқали ўзининг сунъий йўлдошлар туркумини қайта конфигурация қилишни бошлашини маълум қилган.

Эслатиб ўтамиз, аввалроқ SpaceX Starlink сунъий йўлдоши билан алоқани йўқотгани ҳақида хабар берилганди.