Россия ва Украина етакчилар учрашуви бўйича келишиб олди – Туркия ТИВ

Туркия Ташқи ишлар вазири Хоқон Фидан Истанбулдаги музокараларнинг учинчи раундида Россия ва Украина икки давлат раҳбарларининг Туркияда учрашиши“бўйича “принципиал келишувга эришганини” айтди. Бу ҳақда вазир кеча, 25 июль куни Туркиянинг NTV телеканалига берган интервьюсида гапирди.

23 июль куни Истанбулда Украина ва Россия делегациялари ўртасидаги музокараларнинг учинчи раунди бўлиб ўтди.

“Учрашувда лидерларнинг қандай ва қайси шароитда учрашиши муҳокама қилинди. Лидерлар саммитини Туркияда ўтказиш бўйича принципиал келишувга эришилди. Бу ерда музокара ўтказувчи гуруҳлар муҳим роль ўйнайди”, деди Фидан.

У бундай саммит қачон бўлиб ўтиши мумкинлиги ҳақида ҳеч қандай санани айтмади.

“Биз бу масалани янада мувозанатли муҳокама қилишда давом этар эканмиз, мен учрашиш истагини кўрмоқдаман. Агар худди шу руҳда давом этсак, вақтинчалик ечим пайдо бўлишига ишонаман. Ҳамма ҳам бу таклифни қабул қилишга тайёр эмас. Бунинг учун шароит яратиш устида ишлаяпмиз”, дея қўшимча қилди Туркия ТИВ раҳбари.

Истанбулдаги музокараларнинг учинчи раундидан сўнг Украина делегацияси раҳбари Рустам Умаров Владимир Зеленский ва Владимир Путин ўртасидаги учрашувни август ойи охиригача ўтказишни таклиф қилганини айтди. Кремль матбуот котиби Дмитрий Песков 24 июль куни бу сценарийни даргумон деб атади. Унинг сўзларига кўра, саммит тинчлик музокаралари якунида, “бу музокаралар натижалари қайд этилиши учун барча ишлар амалга оширилган”дагина мумкин бўлади.

Бироқ 25 июль куни Зеленскийнинг ўзи россияликлар “энди суҳбатларда бу ҳақда гапира бошлаганини, бу аллақачон қандайдир учрашув форматига ўтиш эканлигини” айтди. Бунга жавобан Песков яна август ойида саммит бўлмаслигини айтди, чунки “юқори даражадаги учрашув келишувга якуний нуқта қўйиши мумкин ва керак”.

Эслатиб ўтамиз, олдинроқ Туркия Президенти Ражаб Тойиб Эрдўған россиялик ва америкалик мавқедошлари Владимир Путин ва Дональд Трамп билан Украинадаги можаро бўйича Истанбулда учрашиш имкониятини муҳокама қилиш учун телефон орқали мулоқот ўтказиш режасини маълум қилганди. АҚШ Президенти Дональд Трамп эса кеча, 25 июль куни Оқ уйнинг жанубий майсазорида журналистлар билан суҳбатда Владимир Путин ва Владимир Зеленский билан уч томонлама учрашув ўтказиши мумкинлигини айтди.