Россияда 49 кишини олиб кетаётган самолёт сирли тарзда йўқолиб қолди 

Бугун, 24 июль куни Россиянинг Амур вилоятида йўловчи ташувчи An-24 самолёти самода алоқага чиқмай йўқолиб қолди. Бу ҳақда вилоят Фавқулодда вазиятлар бошқармаси хабар берди. 

“Angara” авиакомпаниясига тегишли самолёт Хабаровск–Благовешенск–Тинда йўналиши бўйича парвоз қилаётган эди. Унинг бортида 43 нафар йўловчи, жумладан 2 нафар бола, шунингдек 6 нафар экипаж аъзоси бўлган. 

ОАВга кўра, самолёт Тинда шаҳри аэропорти яқинидаги назорат нуқтасида алоқага чиқмаган ва йўқолиб қолган. Айни вақтда қутқарувчилар Тинда туманига йўл олган ва An-24 самолётини қидириш ишларини олиб бормоқда.

Ҳозирча бортнинг тақдири номаълум. Фавқулодда хизматлар ҳодиса ҳақида хабардор қилинган, тафсилотлар аниқлаштирилмоқда.

Эслатиб ўтамиз, аввалроқ Россиянинг Хабаровск ўлкасида “Взлет” авиакомпаниясига тегишли Mi-8T вертолёти бедарак йўқолгани ҳақида хабар берилганди. Бортда 5 киши бўлган. Уларнинг 3 нафари экипаж аъзоси ва 2 нафари техник мутахассислар саналади. Вертолёт Охотск аҳоли пунктидан ҳавога кўтарилган ва Магаданга етиб бориши керак бўлган. Бироқ белгиланган вақтда экипаж билан алоқа узилган.