Россия-Украина музокараларидан мўъжиза кутиш керак эмас – Песков

Россия ва Украина делегациялари ўртасидаги музокараларнинг учинчи раунди якунидан мўъжизавий ютуқлар кутилмаслиги керак, чунки бу мураккаб масала. Бу ҳақда Россия Президентининг матбуот котиби Дмитрий Песков бугун, 22 июль куни ўтказилган матбуот анжуманида сўз очди.

“Ростини айтганда, Украина бўйича муроса жараёни шу даражада мураккабки, ҳатто алмашинувлар ёки ҳалок бўлганлар жасадларини қайтариш бўйича келишувга эришишнинг ўзи ҳам аллақачон натижа ҳисобланади. Мўъжизавий ютуқлар бўйича умид қилишга ҳеч қандай асос йўқ, бу деярли имконсиз”, деган Песков. 

Шунингдек, Президент матбуот котиби учинчи раунд санаси номаълумлиги, Москва жорий ҳафтада Киев вакиллари билан учрашиши мумкинлигини айтган. 

“Тайёр бўлишимиз биланоқ, саналар ҳақида эълон қиламиз. Москва ва Киев учрашуви учун майдон ҳозирча Истанбул бўлиб қолмоқда”, Песков. 

Песков, қолаверса, Украина Президенти Владимир Зеленский тилга олганидек, икки давлат етакчилари даражасидаги музокаралар эҳтимоли ҳақида ҳам изоҳ берган. Россия Президенти матбуот котибининг таъкидлашича, Украинада ҳанузгача Владимир Путин билан музокаралар олиб боришга рухсат йўқ.

Россия ва Украина вакиллари аввалроқ Истанбулда икки марта – 16 май ва 2 июнь кунлари учрашган. Учрашувлар давомида томонлар маҳбусларни алмашиш, шунингдек, вазиятни ҳал қилиш бўйича меморандумлар версияларини алмашиш бўйича келишувга эришган.

Эслатиб ўтамиз, аввалроқ “Independent” газетаси дипломатик манбаларга таяниб, Россия ва Украина ўртасидаги музокараларнинг учинчи босқичи Туркиянинг Истанбул шаҳрида жорий йилнинг 23 ёки 24 июль кунлари бўлиб ўтиши мумкин эканини хабар қилганди.