Трамп Москва ва Пекинга бомба ташлаш билан таҳдид қилган – CNN (аудио)

2024 йилги сайловолди тадбирлари чоғида АҚШ Президенти Дональд Трамп ҳомийларга Россия Президенти Владимир Путинни Украина билан уруш бошламаслик ҳақида қандай огоҳлантиргани, хусусан, у “Москвани бомбардимон қилиш” билан таҳдид қилгани ҳақида сўзлаб берган. CNN бу ҳақдаги аудиоёзувни эълон қилди.  

Трампнинг бу таҳдиди ҳақида 2024 йилнинг май ойида “The Washington Post” ёзган, бироқ ўша пайтда аудиоёзувлар эълон қилинмаган. CNN’нинг ёзишича, аудиолар Республикачилар партиясининг Нью-Йорк ва Флорида штатларидаги ҳомийлари билан учрашувларда ёзиб олинган. АҚШда 2024 йилги сайловлар ҳақида китоб ёзган журналистлар Жош Доус, Тайлер Пейжер ва Айзек Арнсдорф аудиёзувга эга бўлган.

“Мен Путинга “агар сиз Украинага кирсангиз, мен Москвани бомбардимон қиламан. Жиддий айтяпман, менда бошқа танлов йўқ”, деб айтдим. Кейин у “мен сизга ишонмайман, бўлиши мумкин эмас”, деди. Мен ׅ“бўлади”, дедим”, дейди Трамп аудиолардан бирида.

Трампнинг айтишича, Путин унга “10 фоиз” ишонч билдирган. Бироқ у бу суҳбат қачон бўлиб ўтгани ҳақида аниқлик киритмаган. Трамп, шунингдек, худди шундай таҳдидни Хитой раҳбари Си Цзиньпин билан суҳбатда ҳам билдирганини айтган.

АҚШ Президенти бу сафар ҳам Хитой Тайванга бостириб кирса, АҚШ “Пекинни бомбардимон қилиши” билан таҳдид қилган. Трампга кўра, Си бу гапни эшитгач, “Сиз ақлдан озгансизми? Пекин? Сиз Пекинни бомбардимон қилмоқчимисиз?” деб сўраган. Трампнинг айтишича, Си ҳам унга “10 фоиз” ишонган. АҚШ етакчиси бу таҳдидлардан сўнг Си билан “ҳеч қачон муаммо” бўлмаганини таъкидлайди.

Қайд этиш жоиз, сайлов кампанияси давомида Трамп бир неча бор Россия ва Украина ўртасидаги можарони қисқа муддатда тугатишга ваъда берган. Президентликка киришган илк кунлариданоқ у ҳар икки томон тинчликка рози эканини айтган, аммо вақт ўтиши билан на Путин, на Украина Президенти Владимир Зеленскийга ишончи қолмаганини билдирган. Трамп бир неча марта АҚШ бу уруш бўйича воситачиликдан воз кечиши мумкинлигини ҳам айтган. Бу эса можаронинг ҳал қилинишида ижобий силжиш бўлмагани билан изоҳланган.

Эслатиб ўтамиз, аввалроқ Трамп яна бир бор Путиндан норози эканини билдириб, Россияга қарши янги санкциялар жорий этишни “жиддий кўриб чиқаётганини” айтганди.