Туркия вилоятлари аланга ичида қолди (видео)

Туркиянинг бир нечта вилоятларида, жумладан, курорт ҳудудларида ҳам ўрмон ёнғинлари кузатилмоқда. Бу ҳақда İHA хабар берди.

Қайд этилишича, Бурсанинг Усмонғози туманида ўрмон ёнғини юзага келган. Кучли шамол сабабли олов тезлик билан ўрмон ҳудудидан яшаш маҳаллаларига ўтган – бир нечта уйлар шикастланган.

Ёнғинни ўчириш ишларида ўт ўчирувчилар, жандарм бўлинмалари, Туркия Ички ишлар вазирлигига қарашли Фавқулодда вазиятлар бошқармаси (AFAD) ходимлари ва ўрмон хўжалиги мутасаддилари иштирок этмоқда. Қуруқликдаги техника ва шахсий таркибдан ташқари, ўрмон хизмати ва жандармияга тегишли вертолётлар ҳам сафарбар этилган. Операцияда кўнгиллилар ҳам қатнашмоқда.

Хавф зоналарида бўлган аҳоли эвакуация қилинган. Дастлабки маълумотларга кўра, жабрланганлар йўқ.

Анталия вилоятида икки жойда ўрмон ёнғинлари содир бўлган. Улардан бири Аксу туманида – у ерда далалардаги экинлар ёниб кетган. Ёнғин тезкорлик билан чекланиб, иссиқхоналар ва тураржойларга тарқалишининг олди олинган.

Аланья туманида эса ёнғинларни ўчириш ишлари ҳаво ва қуруқлик орқали давом этмоқда.

Ёнғинлар асосан сайёҳлик зоналари ва соҳилбўйи ҳудудларидан узоқда юзага келган. Ёнғин ўчириш ишлари сабаб яқин атрофдаги бинолардан айрим аҳоли вакиллари эвакуация қилинган.

Ўрмон ёнғинларини ўчиришда вертолётлар ва самолётлар иштирок этмоқда. Полиция ёнғинлар сабабини аниқлаш устида иш олиб бормоқда.

Эслатиб ўтамиз, жорий йилнинг май ойида Канаданинг Манитоба провинциясининг жанубида содир бўлган йирик ўрмон ёнғинлари оқибатида икки киши ҳалок бўлганди. Ёнғинларга аномал иссиқлик ва узоқ давом этган қурғоқчилик сабаб бўлган.