Москвада икки махфий агент қўлга олинди

Россия пойтахти Москва шаҳрида Молдова махсус хизматининг икки нафар агенти қўлга олинди. Бу ҳақда бугун, 25 июнь куни Россия Федерал хавфсизлик хизмати хабар берди.

Қайд этилишича, жосуслар Молдова Ахборот ва хавфсизлик хизматининг Россияга қарши қаратилган “муҳим вазифани” бажариши керак бўлган. Лекин айнан қандай вазифа эканлиги очиқланмаган.

Маълум қилинишича, улар Россия ҳудудига сохта шахсни тасдиқловчи ҳужжатлар билан кириб келган. ФХХ гумонланувчилардан айбига иқрорлик олингани, уларга нисбатан қамоққа олиш эҳтиёт чораси қўлланилганини билдирган.

“Биз 2024 йил июнь ойида Ахборот ва хавфсизлик хизмати Ташқи разведка бош бошқармаси ходими томонидан ишга қабул қилиндик. Молдова Республикаси разведкаси учун муҳим вазифани бажариш мақсадида Москва шаҳрига учишимиз кераклиги айтилди”, дейди қўлга олинган Молдова фуқароси.

Қўлга олинганларнинг иккинчиси эса 2023 йилдан буён Молдова разведкаси учун ишлаб келишини маълум қилган.

Хабарда, шунингдек, мазкур ҳолат юзасидан Россия Федерацияси Жиноят кодексининг 275-моддаси 1-қисми (хорижий давлат, халқаро ёки хорижий ташкилот билан махфий ҳамкорлик қилиш) билан жиноят иши қўзғатилгани, агентлар саккиз йилгача озодликдан маҳрум этилиши айтилади.

Қайд этиш жоиз, жорий йилнинг апрелида ФХХ Молдова Республикасининг Россиядаги ваколатхонаси ходими Кирилл Будановни “дипломат ниқоби остидаги агент”ликда айблаб, мамлакатдан чиқариб юборган.

Эслатиб ўтамиз, жорий йилнинг январида Россия Адлия вазирлиги BBC рус хизматининг икки журналистини “хорижий агентлар” рўйхатига киритганди.

Шунингдек, 2022 йил сентябрь ойида Адлия вазирлиги россиялик таниқли телебошловчи ва сўз устаси Максим Галкинни Украина унинг сиёсий фаолиятига ҳомийлик қилмоқда, деган айблов билан “хорижий агентлар” рўйхатига киритган. Ўша йили Галкин, унинг рафиқаси, хонанда Алла Пугачёва ва уларнинг болалари Исроилга кўчиб кетган эди.

Дилшод Ҳакимов