Рим папаси Путинни Украинада тинчликка чақирди

north_east

4-қўнғироқ. Трамп ва Путин “Ўргимчак тўри”ни муҳокама қилди

Рим папаси Лео XIV Россия Президенти Владимир Путинни Украинада “тинчликка ёрдам берадиган ишора” қилишга чақирди. Уларнинг телефон орқали суҳбати ҳақидаги хабар кеча, 4 июнь куни Кремль веб-сайти ва Ватикан янгиликлар порталида чоп этилди.

Ватикан хабар беришича, понтифик Украинада “томонлар ўртасида ижобий алоқалар ўрнатиш ва можарога ечим топиш учун мулоқот муҳимлигини таъкидлаган”. Баёнотда айтилишича, Путин ва Лео XIV, шунингдек, папа элчиси кардинал Маттео Зуппининг саъй-ҳаракатларига асосланиб, гуманитар вазият, ёрдам ва маҳбуслар алмашинувини муҳокама қилган.

“Рим папаси Лео Патриарх Кирилни эслаб, унга понтификлигининг бошида келган табриклари учун миннатдорлик билдирди ва умумий насроний қадриятлари тинчликни излаш, ҳаётни ҳимоя қилиш ва ҳақиқий диний эркинликка эришишга ёрдам берадиган нурга айланиши мумкинлигини таъкидлади”, деди Ватикан матбуот хизмати раҳбари Маттео Бруни.

Кремль матбуот хизматининг маълум қилишича, Путин сиёсий ва дипломатик йўллар орқали тинчликка эришишдан манфаатдор эканини тасдиқлаб, инқирозни якуний, адолатли ва ҳар томонлама ҳал қилиш учун унинг асосий сабабларини бартараф этиш зарурлигини таъкидлаган. 

Баёнотга кўра, Россия Президенти понтификни Истанбулдаги сўнгги музокаралар ҳақида хабардор қилган, ҳарбий асирлар ва ҳалок бўлганларнинг жасадларини алмашиш, шунингдек, украиналик болаларни оилалари билан бирлаштириш ҳақида гапирган.

“Понтификга инқирозни ҳал қилишда ёрдам беришга тайёрлиги, хусусан, Ватиканнинг долзарб гуманитар муаммоларни ҳал қилишда сиёсатсизлаштирилган асосда иштирок этгани учун миннатдорчилик билдирилди”, дея қўшимча қилди Кремль.

Қайд этилишича, Путин Рим папаси билан Украинадаги Москва Патриархияси рус православ черкови тақдирини ҳам муҳокама қилган.

“Муқаддас тахт Украинада диний эркинликни қўллаб-қувватлашда фаолроқ бўлишига умид билдирилди”, дейилади Кремль матбуот хизмати хабарида.

Эслатиб ўтамиз, 12 май куни Рим-католик черкови раҳбари этиб сайланганидан тўрт кун ўтиб, Лео XIV Украина Президенти Владимир Зеленский билан телефон орқали гаплашганди. Президент украиналик болаларни Россия Федерациясидан қайтаришда понтификдан ёрдам сўради ва уни Украинага таклиф қилди.

18 май куни, тахтга ўтирганидан сўнг дарҳол Лео XIV Ватиканда Зеленский билан учрашиб, “Украина учун адолатли ва мустаҳкам тинчлик бўлишини” тилади.