Янги папа Россия ва Украина орасига тушмоқчи

Янги Рим папаси Лео ХIV Россия ва Украина ўртасидаги музокараларни Ватикан ҳудудида ўтказишга тайёрлигини тасдиқлади. Бу ҳақда папа билан бўлган телефон орқали суҳбатдан сўнг, Италия Бош вазири Жоржия Мелони маълум қилди.

Қайд этилишича, Мелони Лео ХIV билан суҳбатда Украинада адолатли ва барқарор тинчликка эришиш масаласини муҳокама қилган. У папа Лео XIVга очиқлиги ва тинчлик йўлидаги собит эътиқоди учун миннатдорлик билдирган.

Папа бундан аввал ҳам Ватикан қуролли можарони ҳал этишда воситачи бўлишга тайёрлигини айтган эди. Ватикан давлат котиби Пьетро Паролин ўшанда Украина бўйича музокаралар вазиятини жуда мураккаб ва фожиали деб баҳолаган эди.

Маълумот учун, жорий йилнинг 18 май куни Украина Президенти Владимир Зеленский папа Лео XIV билан учрашувдан сўнг, Ватикан Украинага ва Россияга тўғридан тўғри музокаралар учун платформа бўлишга тайёрлигини билдирган эди.

Ўша куни Лео ХIV расман Рим папаси сифатида тахтга чиққан эди. Ватикан ҳудудида бўлиб ўтган тантанали маросимда 250 мингдан ортиқ киши иштирок этган, 100 дан ортиқ давлат ва халқаро ташкилотлар вакиллари ҳам қатнашган.

Диний маросим вақтида сўзлаган нутқида папа Украинани эслаб ўтган ва бу мамлакатга тинчлик музокаралари олдинда турганини таъкидлаган. Шунингдек, у Россия асирлигида бўлган украиналик ҳарбийларнинг рўйхатини қабул қилганини ҳам маълум қилган.

19 май куни эса Зеленский Украина ва Россия ўртасидаги янги музокаралар бўлиб ўтиши мумкинлиги ва унда Путин ҳам иштирок этиши мумкинлиги ҳақида гапирган. Ушбу музокаралар ўтадиган эҳтимолий жойлар сифатида Туркия, Ватикан ёки Швейцария кўриб чиқилмоқда.

Эслатиб ўтамиз, Рим папаси Франциск жорий йилнинг 21 апрель куни 88 ёшида инсульт сабаб Ватикандаги қароргоҳида вафот этганди. Унинг дафн маросими 26 апрель куни Ватикандаги Авлиё Пётр майдонида 200 мингга яқин инсон билан ўтказилганди. Шундан сўнг, 8 май куни Лео XIV Рим-католик черковининг бошлиғи бўлганди. У Америка Қўшма Штатларидан чиққан биринчи папа саналади.