“У биздан эмас”. Сибирни “ўзбекларнинг юрти” деган россиялик депутат партиядан қувилди

Россиянинг Ханти-Мансийск округи думасининг Коммунистик партиядан сайланган депутати Холид Таги-Заде “Сибир – ўзбеклар учун тарихий ватан” деган гапи учун партия аъзолигидан чиқарилди. Бу ҳақда URA.RU хабар берди. 

Коммунистик партиянинг Марказий қўмитаси раис ўринбосари Юрий Афонин депутатнинг ушбу баёнотига кескин эътироз билдирган.

“Таги-Заде бир неча йил олдин партия интизомини бузгани сабабли партиядан чиқарилган. У бизнинг номимиздан ҳеч қандай ваколатга эга эмас. Бу – унинг шахсий фикри. Партиянинг ва вилоят бўлимининг расмий позициясига мутлақо зид”, деган Афонин.

Давлат Думасидаги Коммунистик партия депутати Михаил Матвеев эса Таги-Задега янада кескин жавоб берган.

“Бу одам – провокатор. У партиядан чиқарилган ва эндиликда биз билан ҳеч қандай алоқаси йўқ. Унинг аҳмоқона баёнотлари – мутлақо шахсий, бизга тегишли эмас. Бундан ташқари, у бу гапни шунчаки айтмади – бу муҳокама туб халқлар орасидаги туғилиш ва ўлим масалалари доирасида бўлиб ўтди. Бу эса бутун Россияга қарши ҳужум ва туб халқларни мигрантлар билан алмаштиришга уриниш ҳисобланади. Ўзбекларнинг бу ерда тарихий ҳуқуқлари бор деган даъво – бу кимдир томонидан ёзилган методик кўрсатмага ўхшайди”, деган Матвеев.

Маълумот учун, Холид Таги-Заде 1978 йил 15 ноябрда Озарбайжон ССРнинг Сумгаит шаҳрида туғилган. Миллати – озарбайжон. У 2001 йилда Сибир федерал университетини “криминалистик кимё” ихтисослиги бўйича тамомлаб, кимёчи мутахассислигига эга бўлган. Бир вақтнинг ўзида С.А. Решетнёв номидаги Сибир аэро-космик академияси ҳарбий факультетида ҳам таҳсил олган. 

У 2019 йилдан 2021 йилгача Мегион шаҳар Думасининг олтинчи ва еттинчи чақириқлари депутати, Мегион шаҳар Думасидаги Россия Федерацияси Коммунистик партияси фракцияси раҳбари, 2021 йилдан бери эса Ханти-Мансийск автоном округи Думаси – еттинчи чақириқ Угра депутати сифатида ишлаб келмоқда.

Эслатиб ўтамиз, Холид Таги-Заде ушбу баёнотни 29 май куни Ханти-Мансийск мухтор округи парламентининг сўнгги мажлисида айтганди. Унинг ушбу баёноти минтақанинг туб аҳолиси ўртасида туғилиш ва ўлим билан боғлиқ масалалар, шунингдек, Ўзбекистон фуқароларининг Сибирга кўчиши сабабларини муҳокама қилиш жараёнида пайдо бўлган. У Сибир хонлигида Кўчимхон ҳукмронлик қилгани, у эса Шайбонийлар сулоласидан – яъни Бухоро хонлигидан чиққан ўзбек ҳукмдорларидан экани айтган ва ўртага “балки ҳозирги мигрантлар ўз тарихий ватанларига қайтаётгандир?”, деган саволни ташлаган.