Эрдўған Истанбулдаги Россия-Украина учрашуви ажойиб ўтганини айтди

north_east

Россия ва Украина Истанбулда нималарга келишиб олди?

Туркия Президенти Ражаб Тойиб Эрдўған Россия ва Украина делегацияларининг бугун, 2 июнь куни Истанбулдаги Чираган саройида бўлиб ўтган учрашувидан мамнун бўлиб, уни “ажойиб” деб атади. Бу ҳақда Вазирлар Маҳкамаси йиғилишидан кейинги баёнотида сўз очди.

У учрашувдан сўнг маҳбуслар ва ўлганларнинг жасадларини алмашиш бўйича келишувни олқишлаб, бу рақамларни “жуда юқори” деб атаган.

Эрдўғаннинг сўзларига кўра, у “Путин ва Зеленскийнинг Истанбул ёки Анқарада учрашишини” жуда хоҳлайди. Унда АҚШ Президенти Дональд Трамп ҳам иштирок этиши мумкин.

“Менинг энг катта истагим Путин ва Зеленскийни Истанбул ёки Анқарада бир жойга тўплаш. Аслида жаноб Трамп рози бўлса, бу учрашувда иштирок этиши мумкин. Шу йўл билан Истанбулни тинчлик марказига айлантирмоқчимиз”, дея хулоса қилган Туркия раҳбари.

Эрдўған, Россия ва Украина ўртасидаги яқинда содир бўлган маҳбус алмашинувига тўхталар экан, 1000 дан ортиқ одам ўзаро озод қилингани ва ҳалок бўлган аскарларнинг жасадлари қайтарилганини маълум қилди. Туркиянинг бу жараёнда кўмаклашувчи ролини таъкидлаган Эрдўған, тинчлик ва дипломатия учун саъй-ҳаракатларини давом эттиришларини билдирди.