Эрдўған Путиннинг таклифига рози бўлди

Анқара Россия ва Украина ўртасидаги сулҳни қўллаб-қувватлайди ва икки давлат Туркияда музокаралар ўтказишига рози. Бу ҳақда кеча, 11 май куни Туркия Президенти Ражаб Тойиб Эрдўған Россия Президенти Владимир Путин билан телефон мулоқоти чоғида сўз очди.

Маълум қилинишича, мулоқот давомида Путин Истанбулда Россия ва Украина ўртасидаги музокараларни қайта бошлашни таклиф қилган. Туркия томони версиясига кўра, Эрдўған Путинга унинг мамлакати Россия-Украина музокаралари учун майдон тақдим этишга тайёрлигини айтган. Қолаверса, Эрдўған “тинчликка эришиш нуқтаи назаридан имкониятлар ойнаси очилганини” таъкидлаган.

Шу билан бирга, Туркия нашрларининг таъкидлашича, Эрдўған ўт очишни тўлиқ тўхтатиш учун зарур муҳит яратишини ҳам қўшимча сифатида айтган.

Бундан ташқари, етакчилар савдо ва инвеститциявий алоқаларни янада кенгайтириш, шу жумладан энергетика соҳасида стратегик қўшма лойиҳаларни амалга оширишдан ўзаро манфаатдор эканини билдирган.

Эслатиб ўтамиз, аввалроқ АҚШ Президенти Дональд Трамп Туркия етакчиси Ражаб Тойиб Эрдўғанга мурожаат қилиб, Украинадаги можарода воситачилик қилишни сўраган эди. Трампга кўра, Туркия раҳбарининг Россия билан ҳам, Украина билан ҳам алоқаси жуда яхши ва у воситачилик ролини амалга ошира олади. Қолаверса, 10 май куни Украина Президенти Владимир Зеленский ва Киевга борган европалик сиёсатчилар тинчлик саъй-ҳаракатлари бўйича АҚШ Президенти Дональд Трамп билан телефон мулоқот қилган эди. Мулоқотда Зеленский  12 май кунидан бошлаб Украина 30 кунга ўт очишни тўхтатишга тайёрлигини билдирган эди.