Зеленский Трамп билан қўнғироқлашди

Украина Президенти Владимир Зеленский кеча, 8 май куни АҚШ Президенти Дональд Трамп билан телефон орқали мулоқот қилди. Бу ҳақда Украина раҳбари ўзининг ижтимоий тармоқлардаги саҳифасида маълум қилди.

Зеленскийнинг ёзишича, у Трамп билан тинчликка эришиш учун кейинги саъй-ҳаракатлар, жумладан, олиниши мумкин бўлган аниқ қадамлар зарурлигини муҳокама қилган.

“Президент Трамп жанг майдонидаги вазият ҳақида сўради ва мен унга қисқача маълумот бердим. Шунингдек, мен Украина бугундан бошлаб 30 кунлик оташкесимга тайёр эканини айтдим.  Биз Россиядан бу таклифга рози бўлишини кутамиз. Шунингдек, Украина ҳар қандай форматдаги музокараларга тайёр эканлигини тасдиқладим. Лекин бунинг учун Россия тўлиқ ва сўзсиз ўт очишни тўхтатишдан бошлаб, урушни тугатиш ниятининг жиддийлигини кўрсатиши керак”, дея ёзади Зеленский.

Унинг сўзларига кўра, Трамп “бу уруш тугашини хоҳлашини, ёрдам беришга тайёрлигини ва ўт очишни тўхтатиш зарурлигини қўллаб-қувватлашини тасдиқлаган”.

Зеленскийнинг фикрича, АҚШ Россияни 30 кунлик сулҳга рози қилиши мумкин.

“Россияликлар ўт очишни тўхтатишни қўллаб-қувватлаши керак. Улар урушни тугатишга тайёр эканликларини исботлашлари керак. Тинчлик йилларининг бошланиши бўлиши мумкин бўлган ўттиз кун. Ўт очишни узоқ ва ишончли тўхтатишнинг ўзи тинчлик сари ҳаракатнинг ҳақиқий кўрсаткичи бўлади. Америка бунга ёрдам бериши мумкин. Дунё 80 йил аввалгидек Америкага муҳтож”, деган Украина раҳбари.

Маълумот учун, кеча, 8 май ярим тундан бошлаб Россия томонидан эълон қилинган сулҳ амал қилади, у 11 май ярим тунгача давом этади. Москва Киевни унга риоя қилишга чақирди, акс ҳолда “самарали жавоб” беришга ваъда берди. Зеленский ташаббусни рад этиб, 30 кунлик ўт очишни тўхтатишни таклиф қилди ва “уч, беш, етти кун ичида ҳеч нарса ҳақида келишиб бўлмаслигини” тушунтирди.

Эслатиб ўтамиз, аввалроқ АҚШ Президенти Дональд Трамп Туркия етакчиси Ражаб Тойиб Эрдўғанга мурожаат қилиб, Украинадаги можарода воситачилик қилишни сўраган эди. Дональд Трамп Эрдўғаннинг Россия Президенти Владимир Путин билан ҳам, Украина Президенти Владимир Зеленский билан ҳам мулоқот олиб бориш қобилиятини қайд этган. Шу муносабат билан Трамп туркиялик мавқедошига воситачилик қилишни таклиф қилган. Аммо Туркия раҳбарининг бу илтимосга жавоби маълум қилинмаган.