Вашингтон Тошкентга махсус имтиёзларни таклиф қилди – WP

АҚШ Президенти Дональд Трамп маъмурияти Ўзбекистонга Тошкент Қўшма Штатлардан депортация қилинган муҳожирларни қабул қилиши учун унга бир қатор махсус имтиёзларни таклиф қилди. Бу ҳақда “The Washington Post” хабар берди.

Маълум қилинишича, Трамп маъмурияти учинчи давлатлар фуқароларини депортация қилишда мамлакатлардан транзит пунктлари сифатида фойдаланмоқчи. Хусусан, Ўзбекистон билан музокаралар доирасида АҚШ расмийлари мамлакатдан депортация қилинаётган россияликлар ва беларуслар учун транзит пункти сифатида фойдаланишга қарор қилинган. Муҳожирларни Ўзбекистонга жўнатишга асосий сабаб қилиб эса уларнинг мамлакатларидан Қўшма Штатларга тўғридан тўғри рейслар тўхтатилгани кўрсатилган. 

Нашрга кўра, Ўзбекистон расмийси бу ғояни дарҳол қабул қилган. Унда таъкидланишича, америкалик амалдор вазият сиёсий нозикликларни келтириб чиқариши мумкинлигини тан олиб, бир қатор аниқ рағбатларни, жумладан, икки давлат раҳбарлари ўртасидаги телефон суҳбати ёки юқори даражадаги бошқа мулоқотни таклиф қилган. Яъни яқин орада Трамп ва Ўзбекистон Президенти Шавкат Мирзиёев орасида мулоқот бўлиб ўтиши мумкин.

Нашрнинг қўшимча қилишича, бу ҳолат “АҚШга қарши бўлган кучлар, хусусан Хитой ва Россия” томонидан Вашингтон билан Тошкент ўртасида “чуқурлашиб бораётган икки томонлама ҳамкорликни” бузиш мақсадида фойдаланилиши ҳам мумкин.

Ўзбекистоннинг Вашингтондаги элчихонаси нашрнинг изоҳ сўровига жавоб бермаган.

Эслатиб ўтамиз, жорий йилнинг 30 апрель куни АҚШ Ички хавфсизлик департаменти Ўзбекистон ҳукумати билан ҳамкорликда Қўшма Штатлардаги Ўзбекистон, Қозоғистон ва Қирғизистондан бўлган 100 дан ортиқ ноқонуний муҳожирнинг депортациясини амалга оширганди. Қолаверса, АҚШ мазкур амалиётни тарихий деб атаб, Ўзбекистонга миннатдорлик билдирди.