Вучич ва Фицонинг соғлиғида муаммолар аниқланди

Сербия Президенти Александр Вучич ва Словакия Бош вазири Роберт Фицо соғлиғи билан боғлиқ муаммолар туфайли ишчи ташриф ва тадбирларни бекор қилди. Бу ҳақда Сербия ва Словакия ОАВлари хабар берди.

“Tanjug” агентлигига кўра, Вучич АҚШга ташрифи чоғида тўсатдан касал бўлиб қолган ва уни эрта якунлаган. Текширувдан сўнг у Сербияга қайтишга қарор қилди. Президент ҳали ҳам ҳарбий госпиталда қолмоқда; унинг касаллиги сабаблари ҳақида кейинроқ маълум бўлади.

Фицо ҳам охирги дақиқада ишчи дастурини бекор қилди. “Tvnoviny” порталининг ёзишича, бунга суиқасддан кейин юзага келган жиддий соғлиқ муаммолари сабаб бўлган. Фицо, хусусан, 1 Май байрамида иштирок этишдан бош тортишига, Оксфорд университетидаги маърузани ва Нитра шаҳридаги новвойхонада ишлашни кейинга қолдиришига тўғри келди.

Бош вазир Чехиянинг собиқ президенти Милош Земан билан теледастурда ҳам иштирок этмади. Расмий манбалар Бош вазир дастуридаги ўзгаришлар сабаблари ҳақида маълумот бермаяпти.

Эслатиб ўтамиз, ўтган йилнинг 15 май куни Роберт Фицога Вазирлар Маҳкамаси йиғилишидан сўнг йиғилганлар олдига чиққанида, унга қарата ўқ узилган. Оқибатда яраланган Фицо зудлик билан шифохонага ётқизилган. Кейинроқ Словакия Бош вазирига нега суиқасд уюштирилгани ҳақида хабар берилди. Июль ойида Фицо суиқасддан сўнг илк бор ҳукумат йиғилишида иштирок этди.