Покистонда жангарилар ҳужумига учраган 10 нафар ҳарбий ҳалок бўлди (видео)

Покистоннинг Балужистон вилояти пойтахти Кветта шаҳрида содир бўлган террорчилик ҳужумида 10 нафар ҳарбий хизматчи ҳалок бўлди. Бу ҳақда “The Times of India” хабар берди.

Қайд этилишича, ҳарбийлар колоннаси масофадан бошқариладиган қўлбола портловчи қурилма ёрдамида нишонга олинган. Ҳужум учун жавобгарликни “Балужистон озодлик армияси” ўз зиммасига олган. Гуруҳ ўз баёнотида Покистон армиясига қарши ҳужумларни кучайтиришга ваъда берган.

“Бизнинг озодлик учун курашимизни ҳеч нарса тўхтатолмайди, душманга қарши барча кучимиз билан зарба беришда давом этамиз”, дейилади жангарилар мурожаатида.

Вазият кескинлашгани ортидан Покистон армияси Ҳайбер-Пахтунхво вилоятининг Банну туманида контртеррористик операция ўтказган. Покистон Қуролли кучлари Жамоатчилик билан алоқалар бўйича бошқармаси берган маълумотга кўра, камида 6 нафар жангари йўқ қилинган, яна 4 нафари яраланган.

Эслатиб ўтамиз, аввалроқ қуролли гуруҳ Балужистон провинциясининг тоғлар билан ўралган олис ҳудудида туннеллар яқинида “Балужистон озодлик армияси” томонидан поездга ҳужум қилгани ҳақида хабар берилган эди. Жангарилар темирйўл рельсларини портлатиб, поездни тўхтатган. Ушбу поезд Кветтадан Пешоварга кетаётган бўлган.

Шунингдек, ҳужумчилар олти нафар Покистон ҳарбийсини ўлдирган ва агар ҳукумат уларга қарши ҳарбий операция бошласа, гаровдагиларни қатл этишини билдирган. Шу билан бирга, жангарилар асирларни алмашиш бўйича музокараларга тайёр эканликларини ҳам маълум қилган.

Кейинроқ эса  жангари гуруҳи томонидан гаровга олинган поезддан 400 дан ортиқ йўловчи қутқарилди ва улар Кветтага етказилди.