Конгода бортида қарийб 500 киши бўлган кема ёниб кетди (видео)

Конго Демократик Республикасининг шимоли-ғарбида жойлашган ҳудудда бортида қарийб 500 киши бўлган кемада ёнғин чиқиши оқибатида камида 148 киши ҳалок бўлди, яна 100 дан ортиқ одам бедарак йўқолди. Бу ҳақда “Associated Press” хабар берди.

Қайд этилишича, фожиа жорий йилнинг 16 апрель куни содир бўлган. Ҳодиса юз берган пайтда ёғочдан ясалган HB Kongolo моторли кемасида 500 га яқин йўловчи бўлган. Кема Матанкум портидан йўлга чиқиб, Конго дарёси бўйлаб Боломба шаҳрига қараб йўл олган. 

Маълумотларга кўра, кемада йўловчилар учун овқат тайёрланаётган ошхонада ёнғин бошланган. Ёнғиндан сўнг кема бутунлай чўкиб кетган.

“Associated Press”нинг ёзишича, кўплаб омон қолганлар оғир куйиш жароҳатлари олган. Ҳозирда Конго ҳукумати органлари ва Қизил Хоч ташкилоти томонидан бедарак йўқолганларни қидириш ишлари давом эттирилмоқда.

“The Guardian” нашрига кўра, Конгода дарё кемалари миллионлаб одамлар учун асосий транспорт воситаси ҳисобланади. Шунинг учун қайиқ ва кемалар кўпинча ҳаддан ташқари тўлиб кетади. Бу каби ҳалокатлар мамлакатда мунтазам равишда такрорланиб туради.

Эслатиб ўтамиз, аввалроқ Мисрнинг Хургада шаҳрида сайёҳлик батискафи маржон рифларини томоша қилиш учун режалаштирилган сувости экскурсиясини амалга ошираётганда чўкиб кетган эди. Тўрт нафар сайёҳ ҳалок бўлган, бир неча киши бедарак йўқолган. Унинг бортида 45 нафар Россия фуқароси, жумладан болалар ҳам бўлган.