Қарздорлик ҳисобига банклар балансига олинган мол-мулкларни тўғридан тўғри сотишга рухсат этилди

Ўзбекистонда қарздорлик ҳисобига банклар балансига олинган мол-мулклар реализацияси жадаллаштирилади. Бу ҳақда жорий йилнинг 15 апрель куни имзоланган “Қарздорлик ҳисобига банклар балансига олинган мол-мулклар реализациясини жадаллаштириш чора-тадбирлари тўғрисида”ги президент қарорида келтирилган.

Қарорга кўра, 2025 йилнинг 1 май кунидан эътиборан устав фондида давлат улуши 50 фоиз ва ундан ортиқ бўлган банкларга ва улар ҳузуридаги инвестиция компанияларига аукционда сотилмасдан қарздорликларни сўндириш эвазига банк балансига олинган мол-мулкларни бозор қийматида тўғридан тўғри сотишга, шу жумладан, кредит, бўлиб-бўлиб тўлаш, лизинг шартномалари ёки қонунчиликда тақиқланмаган бошқа битимлар орқали сотишга рухсат этилади.

Тижорат банкларига қарздорликларни сўндириш эвазига банк балансига қабул қилинган бино-иншоотлар, технологик ускуналар ва бошқа мол-мулклар негизида тижорат банклари ҳузуридаги инвестиция компаниялари орқали тўхтаб қолган ишлаб чиқариш (хизмат кўрсатиш) фаолиятини тиклаб, уларни тайёр бизнес сифатида салоҳиятли инвесторларга сотиш ҳуқуқи берилади.

2025 йилнинг 1 сентябридан бошлаб даъво аризаси бўйича ишни соддалаштирилган иш юритиш тартибида кўриб чиқиш учун даъвонинг максимал баҳоси қуйидагича бўлади:

• юридик шахсларга нисбатан БҲМнинг 150 бараваригача (56 миллион 250 минг сўмгача);
• якка тартибдаги тадбиркорларга нисбатан БҲМнинг 100 бараваригача (37,5 миллион сўмгача);
• жисмоний шахсларга нисбатан БҲМнинг 50 бараваригача (18 миллион 750 минг сўмгача) оширилади.

Маълумот учун, Президент томонидан имзоланган “Иш ҳақи, пенсиялар ва нафақалар миқдорини ошириш тўғрисида”ги фармонга асосан 2024 йилнинг 1 октябридан эътиборан базавий ҳисоблаш миқдори 10 фоизга оширилган. Шунга кўра, эндиликда Ўзбекистон ҳудудида базавий ҳисоблаш миқдорининг амалдаги суммаси 375 минг сўмни ташкил этади.