Туркия мухолифати Имомўғлининг ҳибсга олинишига қарши намойишларни давом эттиради

Туркиянинг энг йирик мухолифатдаги Жумҳурият Халқ партияси (ЖХП) етакчиси 50 ёшли Ўзғур Ўзел мухолифат томонидан навбатдан ташқари сайловда президентликка номзод сифатида кўрсатилган Истанбулнинг собиқ ҳокими Экрем Имомўғлининг ҳибсга олинишига қарши ЖХП ҳар ҳафта охири турли шаҳарларда намойишлар уюштиришда давом этишини айтди. Бу ҳақда у кеча, 6 апрель куни партиянинг навбатдан ташқари қурултойида сўз очди.

“Reuters”нинг аниқлик киритишича, ЖХП ҳар чоршанба оқшомида ҳам Истанбулнинг турли ҳудудларида митинглар ўтказади.

ЖХПнинг навбатдан ташқари съезди партиянинг 2023 йилги қурултой пайтидаги қонунбузарликлар бўйича прокуратура текшируви пайтида ҳокимият ишончли шахсни тайинлаш тўғрисида қарор қабул қилганидан кейин чақирилди.

Имомўғли ҳибсга олинганидан кейин бир ҳафта ичида партия ҳар куни кечқурун Истанбул муниципалитети биноси олдида катта митинглар ўтказди ва ўтган ҳафта охирида шаҳар туманларидан бирида катта намойиш ўтказди. 

Ўзел эса яна партия раиси этиб сайланди. Маълумотларга кўра, сиёсатчи 1276 делегат овозидан 1171 тасини олган. ЖХП раҳбари, шунингдек, Туркияда муддатидан олдин президентлик сайловларини ўтказиш таклифини такрорлади – жорий йилнинг “ноябридан кечиктирмай”.

Шунингдек, ЖПХ Имомўғли учун озодлик ва эрта сайловлар ўтказиш талаби билан рамзий имзо кампаниясини бошлади.

Имомўғлининг ҳибсга олиниши 

Туркия Президенти Ражаб Тойиб Эрдўғаннинг асосий сиёсий рақиби ҳисобланган Экрем Имомўғли 19 март куни коррупция ва жиноий ташкилотга раҳбарлик қилишда гумонланиб ҳибсга олинган эди.

Туркиянинг давлатга қарашли “Анадолу” агентлигининг хабар беришича, сиёсатчи террорчиликда айбланиб, тергов қилинмоқда. Хусусан, у Туркияда тақиқланган Курдистон ишчилар партиясини қўллаб-қувватлаганликда айбланмоқда.

23 март куни эрталаб Имомўғли суд қарори билан ҳибсга олинган. Шу куни ЖХП Имомўғлини Туркия президентлигига номзод қилиб кўрсатди.

Имомўғлининг айблови Туркияда 2013 йилдан бери энг катта норозилик тўлқинини келтириб чиқарди. Туркия ИИВ маълумотларига кўра, 2000 га яқин одам қўлга олинган. Уларнинг 300 га яқини судгача ҳибсга олинган.