Зеленскийнинг музокараларда иштирок этиши унчалик муҳим эмас – Трамп

Украина Президенти Владимир Зеленский Россия урушини тугатиш тўғрисидаги музокараларда иштирок этиши шарт эмас эди. Бу ҳақда АҚШ Президенти Дональд Трамп кеча, 21 февраль куни “Fox News radio” билан суҳбатда сўз очди.

Трампнинг айтишича, сўнгги уч йил ичида Украина Президенти “учрашувлар ўтказган” ва ҳанузгача можарога чек қўя олмаган.

“Ростини айтсам, мен унинг йиғилишларда ҳозир бўлиши жуда муҳим деб ўйламайман. Зеленский Саудия Арабистонида учрашишга таклиф қилинмади. Айтмоқчиманки, бу устувор эмас эди, чунки у ҳалигача ҳам яхши музокара қилмади. Украинада ўйнаш мумкин бўлган карталар йўқ”, деди Трамп.

Дональд Трамп, шунингдек, олдинги АҚШ президенти Жо Байден ва Зеленский урушнинг олдини олиши мумкинлигини таъкидлади.

“Ҳар сафар айтаман: “Бу Россиянинг айби эмас”. Мени ҳар доим сохта хабарлар учун танқид қилишади. Аммо сизга айтаманки, Байден нотўғри нарсаларни айтган, Зеленский нотўғри гапларни гапирган, уларга катта ва кучли одам ҳужум қилди. Аммо Россияни бундан осонликча қайтариш мумкин эди”, деб ишонади Трамп.

Шу билан бирга, АҚШ Президенти ҳар икки томон билан мулоқотни давом эттиришини таъкидлади.

“Мен Россия ва Украина билан музокаралар олиб бораман”, деди у.

Ар-Риёддаги сўнгги рус-америка музокараларидан сўнг, Дональд Трамп Зеленскийни кескин танқид қилди. АҚШ Президенти, хусусан, Зеленскийни “диктатор” деб атади ва Украинадаги президентлик сайловлари ўтказишга ҳам чақирди.

“Bloomberg”нинг манбаларига таяниб ёзишича,  Кремль Трампнинг Зеленскийга нисбатан кескин оҳангини кутмаган. Манбанинг қайд этишича, Россия расмийлари Трампнинг музокаралар стратегиясини тўлиқ тушунмайди ва бу жараёнда юзага келиши мумкин бўлган тузоқ ва кутилмаган бурилишлардан ҳам эҳтиёт бўлишади.