Жо Байденнинг саратони суякларига тарқалиб кетди

АҚШнинг собиқ президенти Жо Байденнинг простата саратони танасининг бошқа қисмларига, жумладан суякларига ҳам тарқалди. Касаллик унга кучли оғриқ бермоқда. Бу ҳақда унинг ўғли Хантер Байден BBC телеканалига берган интервьюсида маълум қилди.

Хантер Байден отасининг соғлиғи ҳақида гапирар экан, унинг аҳволини кузатиш жуда оғир эканини айтган.

“Саратон тарқалди, метастазлар суякларига ва ундан ҳам бошқа жойларга ўтган. Бу жуда оғриқли ва кўп жиҳатдан ҳолсизлантирувчи”, деган у.

83 ёшли Жо Байден АҚШ тарихидаги энг кекса президент бўлган. Унинг ёши президентлик даврининг катта қисмида хавотирларга сабаб бўлган. Байден ва унинг Оқ уйдаги маслаҳатчилари унинг соғлиғи билан боғлиқ муаммоларнинг кўламини яширганликда кескин танқид қилинган.

Жо Байден саратон касаллигига чалинганини 2025 йил май ойида, Оқ уйни тарк этганидан тўрт ой ўтмай маълум қилган эди.

Хантер Байден отасининг касаллиги бутун оила учун оғир кечганини таъкидлаган.

“Буни кузатиш жуда ачинарли. Отамнинг ҳозирги соғлиғи ҳақида айтадиган ягона гапим – у кўпроқ шикоят қилса эди, деб истардим. Чунки унинг аҳволи яхши эмас”, деган у.

Шунга қарамай, Хантер Байденнинг айтишича, отаси жамоатчилик олдида ўзи муҳим деб ҳисоблаган масалалар юзасидан фикр билдиришда давом этмоқда.

“У ҳали ҳам ўз ишини қилмоқда. У бу мамлакатга жуда ишонади”, деган Хантер Байден.

Интервьюда Хантер Байден отаси томонидан унга берилган афв ҳақида ҳам гапирган. У мазкур қарор учун отасидан миннатдор эканини айтган. Унинг фикрича, агар Жо Байден уни афв этмаганида, Дональд Трамп ундан қасос олишни сўраган бўларди.
Шу билан бирга, Хантер Байден бу қарорни танқид қилиш учун асос борлигини ҳам тан олган.

“Бу осон танқид қилинадиган қарор ва бунга сабаб ҳам бор. Мен фақат отам буни мен учун қилганидан миннатдорман”, деган у.

Эслатиб ўтамиз, Жо Байден 2025 йилда саратон ҳужайраларини олиб ташлаш учун операция қилинган эди.