Жавоҳир ва Бибисора жамоаси Ҳиндистондаги турнирда бронза медални қўлга киритди

Ўзбекистонлик гроссмейстер Жавоҳир Синдоров ва қозоғистонлик шахматчи Бибисора Ассаубаева “Fyers American Gambits” жамоаси таркибида Бангалорда ўтказилаётган Tech Mahindra Global Chess League мусобақасида бронза медалларни қўлга киритди.

Tech Mahindra Global Chess League турнирининг сўнгги куни Жавоҳир Синдоров бошчилигидаги “Fyers American Gambits” жамоаси франциялик таниқли гроссмейстер Максим Вашье-Лаграв сардорлигидаги “Cheq Mumba Masters” жамоасига қарши бронза медаллари учун баҳс олиб борди. “Fyers American Gambits” ҳар икки учрашувда ҳам ғалаба қозониб (4:2, 3,5:2,5), мусобақанинг бронза медалини қўлга киритди. 

Турнир чемпионлиги учун кечган баҳсда Магнус Карлсен бошчилигидаги “Alpine Apl Pipers” жамоаси Ян Непомняший сардорлигидаги “Ganges Grandmasters” жамоасига кутилмаганда имкониятни бой бериб, кумуш медаллар билан кифояланди. “Ganges Grandmasters” чемпионлик шоҳсупасига кўтарилди.

Мусобақа чемпиони бош соврин билан бирга 250 000 АҚШ доллари миқдоридаги мукофот пулини ҳам қўлга киритди. Кумуш медаль соҳиблари эса 125 000, бронза медаль эгалари Жавоҳир Синдоров ва Бибисора Ассаубаева жамоаси 75 000 долларга эга чиқди. Тўртинчи ўринни банд этган “Cheq Mumba Masters” жамоаси 50 000 АҚШ доллари билан тақдирланди.