Накамура Синдоровнинг жаҳон чемпионлиги учун имкониятини баҳолади

Америкалик гроссмейстер Ҳикару Накамура ўзбекистонлик Жавоҳир Синдоров ва ҳиндистонлик амалдаги жаҳон чемпиони Гукеш Доммаражу ўртасидаги бўлажак жаҳон чемпионлиги баҳсида Синдоровнинг фаворит эканлигини айтди. Бу ҳақда у “Rook Review” нашрига берган интервьюсида маълум қилди.

“Холисона қарасам, Синдоровнинг ғалаба қозонмаслигини тасаввур қилишим қийин. Мен кескин курашга бой баҳсни кўришни истардим, аммо энг эҳтимолий натижа Синдоровнинг жуда ишончли ғалабаси бўлади, деб ўйлайман”, дейди Накамура.

Накамура Синдаровнинг ишончли ғалабасини энг эҳтимолий натижа деб ҳисобламоқда. У бўлажак баҳсни Магнус Карлсеннинг 2013 йилда Вишванатан Анандга қарши ўтказган илк жаҳон чемпионлиги учрашуви билан таққослаган.

“Бу 2013 йилда Магнус ва Ананд ўртасидаги баҳсга ўхшаши мумкин. Менимча, бу Карлсеннинг жаҳон чемпионлиги учун илк учрашуви эди. У иккинчи, олтинчи ва ўнинчи партияларда ғалаба қозонган. Бу жуда ишончли ғалаба бўлган. Назаримда, эҳтимолий тўртта сценарий орасида айнан шу вариант устун.

Агар баҳс дуранг билан якунланса, менимча, Гукеш ғалаба қозонади. Бироқ дуранг бўлади, деб ўйламайман. Гукешнинг сўнгги бир ярим йилдаги ўйинларида унинг тўсатдан анча юқори даражада ўйнай бошлашига ишониш учун асос кўрмаяпман”, дейди Накамура.

Эслатиб ўтамиз, Жавоҳир Синдаров ва амалдаги жаҳон чемпиони Гукеш Доммаражу ўртасидаги жаҳон чемпионлиги учун баҳслар жорий йилнинг 24 ноябридан 12 декабрига қадар Женевада бўлиб ўтади. Асосий партиялар Марказий Европа вақти билан соат 15:00 да бошланиши режалаштирилган. Барча партиялар Тошкент вақти билан соат 19:00 га тўғри келади.