Жапаров ёшларни сиёсий хатоларни такрорламасликка чақирди

Қирғизистон Президенти Садир Жапаров мамлакат ёшларини аҳил-иноқликни сақлашга ва ўтган йиллардаги сиёсий ва мансабдор шахсларнинг хатоларини такрорламасликка чақирди. Бу ҳақда у бугун, 24 август куни “Ирис Ордо” конгресс-ҳолининг очилишида сўз очди.

Қирғизистон раҳбарининг сўзларига кўра, маросимда мустақилликнинг 35 йили давомида мамлакатни бошқаришда иштирок этган турли авлод вакиллари, жумладан, депутатлар, вазирлар ва губернаторлар йиғилган. 

“Кеча сиёсий рақиб бўлганимизга ёки бугун қарама-қаршиликларимиз борлигига қарамай, сиёсий қарашлар ва шахсий амбицияларни бир четга суриб, мамлакатимиз манфаатлари йўлида бирга тура олишимиз керак”, дейди Садир Жапаров.

У фуқароларнинг сиёсий қарашлари турлича бўлиши мумкинлигини, аммо Қирғизистон ва унинг келажаги ҳамма учун ягона эканини таъкидлаган. Президент ёшларга мурожаат қилар экан, уларни мураккаб ва тақдирсоз даврларда мамлакат манфаатлари атрофида жипслашишга чақирган.

“Ватан учун оғир кунлар келганда ёки мамлакат учун муҳим масалалар юзага келганда, кейинги авлод сиёсий қарашларидан қатъи назар, бир байроқ остида тўпланиб, ягона позицияни эгаллашга қодирлигини исботламоқда”, деб қайд этган мамлакат раҳбари.

Президент Мустақилликнинг 35 йили давомида Қирғизистон сиёсатчилари ва мансабдор шахслари тез-тез низолашгани, популизм билан шуғуллангани, бир-бирини танқид қилиб, айблаганини, жамият эса ҳудудий белгилар бўйича бўлиниб кетганини билдирган. Шу сабабли давлат сезиларли муваффақиятларга эриша олмаган.

Садир Жапаров ёшларни сиёсий ҳаётнинг ушбу салбий томонларидан ўрнак олмасликка ва мамлакат келажагини ҳамжиҳатлик ҳамда ўзаро ҳурмат асосида қуришга чақирган.

Эслатиб ўтамиз, аввалроқ Садир Жапаров навбатдаги президентлик сайловида иштирок этиб, иккинчи муддатга сайланиш учун номзодини қўйиш нияти борлигини билдирганди.