Зеленскийнинг баёнотидан сўнг Москва аэропортларида рейслар бекор қилинди

Украина Президенти Владимир Зеленскийнинг Россия ҳаво ҳудудини ёпиш ҳақидаги баёнотидан сўнг Москвадаги 3 та йирик аэропортда 77 та рейс кечиктирилди ёки бекор қилинди. Бу ҳақда “The Moscow Times” хабар берди.

Маълум қилинишича, 77 та рейснинг 40 таси Шереметьевода, 20 таси Домодедовода ва 17 таси Внуковода кечиктирилган ёки бекор қилинган. Айрим рейслар 6 соатгача, Анталиядан келаётган рейс эса 9 соатдан кўпроқ вақтга кечиктирилган.

Шунингдек, Туркиянинг Pegasus авиакомпанияси Внуковога амалга оширилиши керак бўлган 6 та рейсни бекор қилган. Йўловчиларга чипталарни бошқа санага кўчириш ёки пулни қайтариш таклиф қилинган.

Россия Мудофаа вазирлигининг маълумотига кўра, 2 сентябрь куни тунда мамлакатнинг 11 та ҳудуди устида 130 та Украина дрони йўқ қилинган. Москва мэри Сергей Собяниннинг айтишича, пойтахт томон учган 12 та дрон уриб туширилган.

Эслатиб ўтамиз, аввалроқ, 1 сентябрь куни Владимир Зеленский Россия ҳаво ҳудуди фуқаролик авиацияси учун хавфли бўлиб бораётганини айтган эди. У Россия ҳаво ҳудудидан фойдаланаётган авиакомпаниялар, суғурта компаниялари ва бошқа томонларни огоҳлантирган.  Шундан сўнг Россия Президенти Владимир Путин Зеленскийнинг баёнотини “давлат терроризмига даъво” деб атаган.