ЙПХ ходимларидан қочган мотоциклчи 15 суткага қамалди (видео)

Тошкент шаҳрида йўл-патруль хизмати ходимларидан қочган 26 ёшли мотоциклчи 15 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, жорий йилнинг 9 август куни соат 00:00 ларда 2000 йилда туғилган М.И. Тошкент шаҳри Ц 1-даҳасида ўзига тегишли рақамсиз мотоциклда ИИБ ходимининг тўхташ ишорасига бўйсунмаган. Бундан ташқари, у ўзининг Instagram саҳифасига ИИБ ходимларини обрўсизлантирувчи ҳар хил видеоларни жойлаштирган.

Кеча, 11 август куни ушбу ҳолатлар юзасидан тушунтириш хати олиш ва мотоциклни жарима майдончасига олиб кетиш айтилганида, М.И. ИИБ ходимларининг қонуний талабини бажармасдан фаол қаршилик кўрсатган ва кўчада бақир-чақир қилиб, жамоат тартибини бузган.

Кеча, 11 август куни Жиноят ишлари бўйича Олмазор туман судида макзур иш кўриб чиқилган. Судда М.И. айбига иқрор бўлиб, қилмишидан пушаймонлигини билдирган ва суддан енгиллик беришни сўраган. У Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) 1-қисмида назарда тутилган ҳуқуқбузарликни содир этган деб топилган ва узил-кесил 15 сутка маъмурий қамоқ жазоси тайинланган.

Эслатиб ўтамиз, аввалроқ Тошкент шаҳрида мотоциклнинг орқа балонини тутатган қизга чора кўрилган эди.