“Ётоқхона машмашаси” бошланди. Кимлар имтиёзлилар қаторида?

Ўзбекистонда айрим тоифадаги Олий таълим муассасалари талабалари устуворлик асосида ётоқхонага жойлаша олади. Бу кеча, 14 август куни республика Вазирлар Маҳкамаси томонидан қабул қилинган “Олий таълим муассасалари талабаларини турар-жой билан таъминлаш тизимини такомиллаштириш чора-тадбирлари тўғрисида”ги қарорда назарда тутилган.

Қарорга кўра, қуйидагилар талабалар турар жойларига биринчилардан бўлиб қабул қилинади:

• “Меҳрибонлик уйлари” тарбияланувчилари, етим ва ота-она қарамоғидан маҳрум бўлганлар;
• “Ижтимоий ҳимоя ягона реестри”, “Темир дафтар” ва “Аёллар дафтари”га киритилган ижтимоий ҳимояга муҳтож оилаларнинг фарзандлари ҳамда “Ёшлар дафтари”да турадиганлар;
• I ва II гуруҳ ногиронлиги бўлганлар;
• бир оиладан бакалавриат босқичи кундузги таълим шаклида икки ёки ундан ортиқ тўлов-шартнома асосида ўқиётган оилалар фарзандлари;
• халқаро фан олимпиадалари, Олий таълим, фан ва инновациялар вазирлиги томонидан ўтказиладиган республика фан олимпиадаларининг ғолиблари;
• “Йил талабаси” ва “Талабалар театр студиялари” кўрик-танловларининг республика босқичи ғолиби бўлганлар;
• олий таълим муассасалари талабалари ўртасида ўтказилган “Заковат” интеллектуал ўйинининг республика босқичида ғолибликни қўлга киритганлар;
• талабалар ётоқхонасида кенгаш раиси, қават сардори бўлган талабалар имтиёзлилар сирасига киради.

Аввалроқ 2023/2024 ўқув йилида 1-курс талабалари, 2024/2025 ўқув йилидан эса барча курс талабалари учун давлат ОТМ ётоқхонасига жойлашиш онлайн амалга оширилиши ҳақида хабар берган эдик.