Японияда кучли зилзила содир бўлди. Жароҳатланганлар бор (видео)

Япония марказида содир бўлган 5,7 магнитудали зилзила оқибатида камида 22 киши жароҳатланди. Бу ҳақда “Associated Press” хабар берди.

Қайд этилишича, зилзила бугун, 8 ноябрь куни маҳаллий вақт билан соат 01:04 да Сидзуока префектурасида, ер остида 40 километр чуқурликда содир бўлган. Япония Метеорология агентлиги зилзила магнитудасини 5,7 деб баҳолаган бўлса, АҚШ Геология хизмати 5,5 магнитудани қайд этган.

Ер силкиниши Айти префектураси ва унга яқин ҳудудларда, жумладан, Ҳамамацу шаҳри, шунингдек, Киото, Нара, Яманаси ва Гифу префектураларида сезилган. Энг кучли силкиниш Айтида кузатилган.

Япония телеканаллари тарқатган кадрларда дўконларнинг синган ойнаси ва кўчаларга сочилиб кетган шиша парчаларини кўриш мумкин. Китоб дўконларидан бирида эса жавонлардаги китоблар ерга сочилиб кетган. Жароҳатланганларнинг айримлари зилзила пайтида бинодан чиқишга уринаётганда зинадан йиқилган.

Метеорология агентлиги аҳолини келгуси бир ҳафта давомида, айниқса, яқин икки-уч кун ичида яна кучли ер силкинишлари содир бўлиши мумкинлигидан огоҳлантирди. Шунингдек, кўчкилар, тоғ жинсларининг қулаб тушиши ва ёғингарчилик оқибатларидан эҳтиёт бўлишга чақирди.

Агентлик вакили Аятака Эбита ҳозирча Нанкай чуқурлигидаги тектоник плиталар ҳаракатида катта зилзила хавфини кўрсатувчи ўзгаришлар аниқланмаганини билдирган.

Зилзиладан кейин таъсирланган ҳудудларда “Синкансэн” тезюрар поездлари эҳтиёт чораси сифатида пастроқ тезликда ҳаракатланган. Бу темир йўл инфратузилмасига етказилиши мумкин бўлган зарарнинг олдини олиш мақсадида амалга оширилган.

Маълумот учун, Япония зилзилалар тез-тез содир бўладиган ҳудудда жойлашган. Шу боис мамлакатда аҳолига фавқулодда вазиятлар учун сув, озиқ-овқат ва батарейкалар захирасини тайёрлаб қўйиш, шунингдек, зилзила вақтида хавфсиз жойни эгаллаш бўйича тавсиялар бериб борилади.

Эслатиб ўтамиз, аввалроқ Хитойнинг Тибет мухтор районида 7 магнитудали зилзила содир бўлгани ҳақида хабар берилган эди.