Мактабларда гибрид таълим тизими жорий этилган – Шерматов ота-оналарга мурожаат йўллади

Аввалроқ, жорий йилнинг 29 март кунидан умумтаълим мактабларида 4-чорак дарслари бошланиши ҳақида хабар берган эдик.

Мамлакатда коронавирус инфекциясининг кўпайиши шароитида, мактабларнинг масофавий таълим шаклига ўтказилиши бўйича ота-оналардан кўплаб саволлар келиб тушмоқда. Шу муносабат билан Ўзбекистон Халқ таълими вазири Шерзод Шерматов ота-оналарга мурожаат йўллади.

"Яна бир бор эслатиб ўтмоқчимиз, ўқувчиларга қулайлик яратиш мақсадида жорий ўқув йилида гибрид таълим тизими жорий этилган, яъни фарзандини мактабга юбориб анъанавий таълим олиши ёки уйдан бепул телевизион “Онлайн мактаб” каналлари орқали масофавий таълим олиши бўйича қарорни ота-оналарнинг ўзи қабул қилади", дейди вазир.

У эпидемиологик ҳолат оғирлашган ҳудудларда, маҳаллий ҳокимлик органларига карантин талабларини кучайтириш чораларини кўриш ваколати берилганини ҳам эслатган. Вазиятни инобатга олиб, ҳудудий ҳокимликлар баъзи туманлардаги мактабларни тўлиқ масофавий таълим шаклига ўтказиш бўйича қарор қабул қилиши мумкин. Ўз навбатида, мактабларнинг маъмуриятига  санитария-гигиена талабларига қатъий риоя этиш бўйича топшириқ берилган.

"Пандемия нафақат дунё иқтисодиёти ва таълим тизимига, балки инсонларнинг асабига ҳам салбий таъсир кўрсатаётганига гувоҳ бўляпмиз. Шундай экан, қадрли ота-оналар, жойларда мактаб жамоаси билан ўзаро ҳурматни сақлаган ҳолда, фақат биргаликда ушбу вазиятдан чиқиб кетишимиз мумкинлигини тушунишингизни сўраймиз!", дейди Шерматов.