Вэнс Эрон билан урушни очиқчасига танқид қилди

АҚШ вице-президенти Жей Ди Вэнс Президент Дональд Трамп бошлаган Эрон билан урушни очиқ танқид қилди. Бу ҳолат Республикачилар партияси Конгрессга бўлиб ўтган оралиқ сайловларда мағлубиятга учраганидан кейин содир бўлди. Бу ҳақда “The Washington Post” нашри хабар берди.

Маълумотларга кўра, Вэнс ўз баёнотини эълон қилишдан олдин уни Президент билан келишмаган бўлиши мумкин. Бу эса вице-президентнинг Трампдан сиёсий жиҳатдан узоқлашишга ҳаракат қилаётгани ҳақидаги тахминларни келтириб чиқарди.

Вэнс X ижтимоий тармоқда қолдирган баёнотида Республикачилар партиясининг сайловдаги мағлубиятига Эрон билан боғлиқ оммабоп бўлмаган уруш сабаб бўлганини таъкидлади.

“Агар сиз бу уруш бунга арзирди, кейинги олти йил давомида Сенатдаги кўпчилик ўрнини йўқотиш ҳам шунга арзирди, деб ҳисобласангиз, марҳамат”, деб ёзган Вэнс.

Бироқ Трамп Эрон билан урушни бошлаш тўғри қарор бўлганини таъкидлашда давом этган. 4 ноябрь куни журналистлар билан суҳбатда: “Эрон масаласида биз буни қилишимиз керак эди ва ҳозир ҳам шу ишни давом эттиряпмиз”, дейди у.

Шунингдек, Трамп ўша куни эрталаб Вэнс билан гаплашганини маълум қилган. Вице-президентнинг баёноти ҳақидаги саволга жавоб берар экан, унинг позициясини тушунишини айтган ва: “Менимча, бу яхши бўлди”, дея муносабат билдирган. Трамп уруш оралиқ сайловларга таъсир қилишини билганини ҳам тан олган, бироқ ўз қарорларини ҳимоя қилган.

Қайд этилишича, АҚШнинг хориждаги ҳарбий аралашувларига нисбатан узоқ вақтдан бери эҳтиёткор позицияни қўллаб келган Вэнс Трамп Эрон билан урушни бошлаганидан кейин уни ҳимоя қилишда фаоллик кўрсатмаган. У ҳатто ҳарбий ҳаракатларни тугатишга қаратилган уринишларда ҳам иштирок этган, аммо бу ташаббус муваффақиятсиз якунланган.

Вэнс 2028 йилда бўлиб ўтадиган президентлик сайловларида Республикачилар партиясидан номзод сифатида кўрсатилиши мумкин бўлган сиёсатчилардан бири ҳисобланади.

Айрим таҳлилчилар фикрича, унинг урушни очиқ танқид қилиши ўзининг мустақил сиёсий позициясини шакллантириш ва маъмуриятнинг омма орасида қўллаб-қувватланмаётган қарорлари учун жавобгарликдан четда қолишга уриниш бўлиши мумкин. Бундай қарорлар қаторига мигрантларга қарши рейдлар ва савдо божлари ҳам киради.

Бироқ Трамп билан очиқ келишмовчиликка бориш Вэнс учун хавфли бўлиши мумкин. Чунки Президент ўз атрофидаги сиёсатчилардан анъанавий равишда садоқат талаб қилади.

Маълумот учун, 2028 йилги президентлик сайловларида иштирок этиши мумкин бўлган яна бир номзод сифатида АҚШ Давлат котиби Марко Рубио ҳам тилга олинмоқда.

Америка оммавий ахборот воситаларида унинг эҳтимолий истеъфоси ҳақида тахминлар пайдо бўлди. Бироқ Рубионинг ўзи бу хабарларни рад этди. У “The New York Times” нашрига берган интервьюсида ўз ишини яхши кўришини айтган, аммо президентлик сайловларида иштирок этиш эҳтимоли ҳақидаги саволларга ҳозирча аниқ жавоб бермаган.

Эслатиб ўтамиз, аввалроқ Дональд Трамп оралиқ сайловлардан кейин миллий хавфсизлик бўйича маслаҳатчилари билан Эрон масаласига бағишланган илк йиғилишни ўтказгани ҳақида хабар берилган эди. Йиғилиш якунида у Эронга қарши кенг кўламли ҳарбий зарбаларни қайта бошлаш ёки бошламаслик бўйича тез орада қарор қабул қилишини билдирган.