Ўзгидромет шошилинч огоҳлантирди

Ўзгидромет директори Шерзод Ҳабибуллаев Республиканинг тўртта вилоятида сел-сув тошқини юзага келиши мумкинлигидан огоҳлантирди. Бу ҳақда у Facebook'даги саҳифасида маълум қилди.

Қайд этилишича, 5-7 июль кунлари ёмғир ёғиши кутилаётгани сабабли, республиканинг тоғолди ва тоғли ҳудудларида сел-сув тошқини ҳодисалари юзага келиши мумкин.

Унга кўра, қуйидаги ҳудудларда эҳтиёт чораларини кўриш сўралади:

• Тошкент вилояти – Оҳангарон, Бўстонлиқ, Паркент, Пискент, Ўртачирчиқ, Юқоричирчиқ туманларида ва Ангрен, Олмалиқ шаҳарларида;
• Наманган вилояти – Поп, Косонсой, Чортоқ, Чуст, Наманган, Янгиқўрғон туманларида;
• Фарғона вилояти – Сўх, Шоҳимардон, Фарғона, Бешариқ туманларида;
• Андижон вилояти – Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманларида ва Хонабод шаҳрида.

“Тоғолди ва тоғли ҳудудларда истиқомат қилувчи фуқаролардан эҳтиёт чораларини кўришларини сўраймиз”, дейди Шерзод Ҳабибуллаев.