Ўзбекистоннинг Истанбулдаги консулхонаси огоҳлантириш билан чиқди

Ўзбекистоннинг Истанбулдаги бош консулхонаси Туркиядаги ўзбекистонлик хотин-қизларни огоҳлантирди. Бу ҳақда консулхонанинг Telegram-каналида хабар берилди.

Қайд этилишича, ижтимоий тармоқларда ўзбекистонлик хотин-қизларни Истанбул, Анталья, Измир, Бодрум ва бошқа шаҳарларга катта маблағ эвазига консоматрис хизматларга ёллашга оид рекламалар тарқатилаётгани кузатилмоқда. 

Бунда павиён (тунги кафе) ходимлари ёш қизларни мижозларига ўз нархидан оширилган баҳосида ичимлик ва озиқ-овқатларни сотиб олишга кўндириш учун ёлламоқда. 

Айни пайтда мазкур фаолият билан шуғулланганларга маҳаллий полиция томонидан Туркиядан чиқариб юбориш жазоси қўлланиляпти. 

“Ҳурматли опа-сингиллар! Бу консоматрис фаолияти бизнинг урф-одатимиз, миллий анъаналаримиз ва муқаддас динимизга тўғри келмаслиги ҳаммамизга маълум. Туркия ҳудудида ҳуқуқбузарликлар иштирокчиси бўлиб қолишингиз, жабр кўришингиз ёки айбдор бўлиб қолишингизнинг олдини олиш мақсадида, сиз яшаб турган давлатнинг қонун талабларига риоя қилишингизни, ўзингиз ва яқинларингиз ҳаёти ва соғлиғига хавф туғдириши мумкин бўлган жойлар ва шахслардан йироқ бўлишингизни тавсия қиламиз”, дейилади хабарда.

Шунингдек, бош консулхона аҳолидан агар шу каби реклама тарқатаётганлар ва консоматрисликка жалб қилаётган шахслар ҳақида маълумот бўлса, консулхонага хабар беришни сўраган.