Ўзбекистон делегатлари Нетаньяхунинг БМТдаги нутқини бойкот қилди (видео)

Кеча, 24 сентябрь куни Бирлашган Миллатлар Ташкилоти Бош Ассамблеясининг 81-сессиясида Исроил Бош вазири Биньямин Нетаньяху нутқ сўзлади. Унинг нутқи аввалида кўплаб давлатлар, жумладан, Ўзбекистон ва Қирғизистон делегатлари норозилик сифатида зални тарк этди. Буни “Reuters” эълон қилган суратлардан кўриш мумкин.

Нетаньяху БМТ Бош Ассамблеясида сўнгги бир неча кун давомида минбардан Исроилнинг Ғазо секторидаги ҳарбий ҳаракатларини қоралаган кўплаб дунё етакчиларидан сўнг сўзга чиққан. Нетаньяху залда пайдо бўлиши билан бир вақтнинг ўзида ҳам қўллаб-қувватлаш, ҳам норозилик ҳайқириқлари янграган, делегатлар эса оммавий равишда ўз ўринларини тарк эта бошлаган. “Reuters” нашри эълон қилган суратда Ўзбекистон ва Қирғизистон делегатларининг ҳам ўрни бўш қолганини кўриш мумкин. 

Залда қолганлар орасида Президент Александр Вучич бошчилигидаги Сербия делегацияси ҳам бор. Шунингдек, Қозоғистон ва Озарбайжон вакиллари ҳам зални тарк этмаган.

Исроил Бош вазири залдан чиқиб кетганларни “ахлоқий қўрқоқлар” деб атаган ва Исроилнинг Ғазо секторида геноцид олиб бораётгани ҳақидаги айбловларни “асрнинг энг катта ёлғони” деб атаган. У, шунингдек, АҚШнинг Эронга қарши урушига қўшилиш ўзи қабул қилишига тўғри келган “энг енгил қарорлардан бири” бўлганини қўшимча қилган.

“Associated Press”нинг қайд этишича, Фаластин миллий маъмурияти раҳбари Маҳмуд Аббос ҳам шу кунда БМТда нутқ сўзлаган, аммо видеоалоқа орқали – АҚШ кетма-кет иккинчи йил унга Бош Ассамблеяда иштирок этиш учун виза беришни рад этди.

Эслатиб ўтамиз, аввалроқ Туркия Президенти Ражаб Тойиб Эрдўған Бирлашган Миллатлар Ташкилотининг 81-Бош Ассамблеясида Ғазо бугун нафақат дунёдаги энг катта қабристон, балки дунёда ампутация кўрсаткичи энг юқори бўлган минтақа ҳисобланишини, шунингдек, Ғазо – ҳозирги даврнинг энг инсонийликка зид, энг уятли қирғини эканини айтган эди.

Бундан ташқари, Франция Президенти Эммануэль Макрон Нью-Йоркдаги БМТ Бош Ассамблеясидаги чиқиши чоғида Фаластиндаги вазият ҳақида гапираётиб, минбарга муштини урганди. У АҚШ Президенти Дональд Трампнинг тинчлик режаси муваффақияти ҳақидаги баёнотларини шубҳа остига қўйиб, эълон қилинган тинчликка қарамай, Ғазо секторида шу кунгача бирорта ҳам гуманитар коридор очилмаганини айтган. Франция етакчиси дунё “ҳамма уятда қолиши керак бўлган” вазиятни кузатаётганини айтган ҳамда Трампни Ғазо бўйича ўз режасини дипломатик зафар сифатида тақдим этгани учун танқид қилган.