“Ўрда” нашрининг бош муҳаррири 8 йилга қамалди

Қозоғистонда “Ўрда” нашрининг собиқ бош муҳаррири Гулнора Бажкенова ноқонуний тадбиркорлик, ўта кўп миқдорда маблағ ўзлаштириш ва била туриб ёлғон ахборот тарқатишда айбдор деб топилиб, 8 йилга озодликдан маҳрум қилинди. Бироқ жазони ижро этиш 2 йилга кечиктирилди. Бу ҳақда бугун, 19 август куни “24kg” хабар берди.

Маълум қилинишича, Олмаота шаҳри суди унинг иши бўйича ҳукмни кеча, 18 август куни чиқарган. Бажкеновага кейинги 5 йил давомида журналистика ва тадбиркорлик билан шуғулланиш ҳам тақиқланган. Прокуратура ҳам унга 8 йиллик қамоқ жазосини 2 йилга кечиктиришни сўраган.

Қайд этилишича, журналист судга саломатлиги ёмонлиги сабабли ногиронлар аравасида олиб келинган. Суд жараёни давомида у бир неча марта соғлиғи заифлигидан шикоят қилган, аммо судья мажлисни қолдиришдан бош тортган. Унга укол қилинган ва шифокорлар судланувчи жараёнда иштирок этиши мумкинлигини тасдиқлаган.

Ноқонуний тадбиркорлик бўйича терговда Бажкенова якка тартибдаги тадбиркор мақомига эга бўлмаган ҳолда кўчмас мулк билан битимлар тузганини билдирган. У сотилган квартиралар қиймати ошишидан олинган даромаддан 12 миллион тенгедан ортиқ солиқ тўламаганликда айбланган.

Билдирилишича, ўзлаштириш бўйича айбловга қарийб 88 миллион тенге киритилган. Шундан 4,6 миллион тенгеси Гулнора Бажкенова томонидан компания ҳисобидан 11 ёшли ўғлининг таълими учун ўтказилган. Судланувчи ўша пайтда давлат унинг шахсий ҳисобларини хатлагани, таълим муассасаси эса нақд пул қабул қилмаганини тушунтирган.

Бажкенова маблағни тўлиқ қоплашни режалаштирганини, аммо уй қамоғига олингунига қадар буни амалга оширишга улгурмаганини айтган. Шунингдек, у компанияга бир неча бор ўз маблағларини киритгани ва шахсий инвестициялари олиб қўйилган суммадан анча кўп бўлганини таъкидлаган.

Манбага кўра, яна 83 миллион тенге бош муҳаррир томонидан бир неча йил давомида таҳририят ходими Ислом Абдукапаровнинг ҳисоб рақамига ўтказилган. Бажкенованинг сўзларига кўра, бу маблағлар нақдлаштирилиб, журналистларга иш ҳақи сифатида тарқатилган.

Бу версияни Абдукапаровнинг ўзи, компания бухгалтери ва судда кўрсатма берган ходимлар ҳам тасдиқлаган. Улар нақд пул олгани ҳақида тилхатлар ёзганини билдирган, аммо суд ушбу ҳужжатларни иш материалларига қўшишдан бош тортган.

Қайд этилишича, била туриб ёлғон ахборот тарқатиш бўйича айбловга 8 та матн асос бўлган. Уларнинг 2 тасини Бажкенованинг ўзи, қолганларини эса “Ўрда”нинг собиқ 4 нафар ходими ёзган. 4 муаллифдан 3 нафари судда кўрсатма бериб, материалларнинг ҳақиқийлигини тасдиқлаган.

Маълумот учун, журналист 2025 йил 1 декабрдан бери уй қамоғида эди. Ўша куни куч ишлатар тузилмалар нашр таҳририятларида тинтувлар ҳам ўтказган.

Гулнора Бажкенова, аввалроқ унга босим ўтказилаётгани ва бизнесни рейдерлик йўли билан эгаллаб олишга уриниш бўлганини айтган. “Ўрда” нашри эса манфаатлар тўқнашуви сабабли ўзининг собиқ раҳбари устидан ўтказилган суд жараёнини ёритишдан бош тортган.

Эслатиб ўтамиз, аввалроқ Ҳиндистон суди машҳур “Tehelka” журналининг собиқ бош муҳаррири Тарун Тежпални ҳамкасбини зўрлаганликда айбдор деб топганди.