Украинаниг “севимли” нишони: Wildberries’нинг энг йирик омбори бомбаланди (видео)

Москва ва Москва вилояти бугун, 16 августга ўтар кечаси дронлар ҳужумига учради. Зарба оқибатида Подольскдаги “Коледино” индустриал парки ҳудудида жойлашган Wildberries маркетплейси омборида ёнғин чиқди. Бу ҳақда вилоят ҳокимияти хабар берди.

Москва вилояти губернатори Андрей Воробьев камида бир киши ҳалок бўлгани ва яна олти киши жароҳатлангани ҳақида хабар бермоқда. У ушбу ҳужумни охирги вақтлардаги энг оммавий ҳужумлардан бири деб атаган.

Ҳокимият томонидан тасдиқланган, ҳужумга учраган объектлар орасида Подольскдаги Wildberries омбори ҳам бор. Бу компаниянинг Россиядаги энг йирик логистика марказларидан бири. Wildberries’нинг ўзи ушбу ҳужумга изоҳ бермади. Воробьевнинг постида таъкидланишича, ушбу ҳужум оқибатида жабрланганлар йўқ.

Шунингдек, губернатор Домодедоводаги яна бир омбор биносида ёнғин чиққанини тасдиқламоқда. У буни “дори-дармонлар омбори” деб атаган. OSINT-лойиҳалар ва маҳаллий ҳокимият гап “Северное Домодедово” мажмуаси ҳақида кетаётганини тасдиқламоқда.

Москва мэри Сергей Собяниннинг сўзларига кўра, пойтахтга қилинган тунги ҳужумда 600 га яқин дрон иштирок этган. Бундан ташқари, тунда Ростов вилояти ҳам ҳужумга учраган. Беш киши ҳалок бўлган ва яна бир киши жароҳатланган.

Эслатиб ўтамиз, аввалроқ маркетплейс омборларига дронлар ҳужумидан Wildberries ва платформа сотувчиларига етказилган умумий зарар 600-800 миллиард рублга баҳоланаётгани ҳақида хабар берилган эди. Шунингдек, Wildberries асосчиси ва бош директори Татьяна Ким Украина дронларининг компания логистика объектларига қилган ҳужумлари оқибатида Ўзбекистон ва бошқа бир қатор мамлакатлар тадбиркорлари миллиардлаб зарар кўрганини маълум қилганди.