Украинада бир қатор вазирлар истеъфога чиққанини эълон қилди

Украинанинг бир қанча вазирлари Олий Радага (парламентга) ўз истеъфоларини тақдим этди. Бу ҳақда Олий Рада спикери Руслан Стефанчук маълум қилди.

Ишдан бўшатиш тўғрисидаги аризалар қуйидагилар томонидан тақдим этилган:

• Атроф-муҳитни муҳофаза қилиш вазири Руслан Стрелец;
• Стратегик саноат вазири Александр Камишин;
• Адлия вазири Денис Малюська;
• Давлат мулки жамғармаси раҳбари Виталий Коваль.

“Барча аризалар кейинги ялпи мажлислардан бирида кўриб чиқилади”, дейди Стефанчук.

Александр Камишин ўзининг Telegram-каналида мудофаа саноати соҳасида ишлашда давом этиши, аммо бошқа лавозимда ишлаши ҳақида маълум қилди.

Денис Малюська 2019 йил 29 август куни Адлия вазири лавозимини эгаллаган эди. У Президентнинг “Халқ хизматчиси” партияси аъзоси. Украина оммавий ахборот воситалари, жумладан “Зеркало Недели” у июль ойи ўрталарида истеъфога чиқиш тўғрисида ариза ёзганини хабар қилганди.

Александр Камишин 2023 йил март ойида Украинанинг Стратегик саноат вазири бўлди. Бунгача у “Укрзализница” (Украина темир йўллари) бошқаруви раиси бўлган.

Руслан Стрелец 2022 йил апрелидан Украина Атроф-муҳитни муҳофаза қилиш ва табиий ресурслар вазири, 2021 йил ноябридан эса вақтинчалик ушбу вазирлик раҳбари вазифасини бажариб келаётган эди. Бунгача у Днепропетровск вилояти маъмуриятида ишлаган.

Эслатиб ўтамиз, 30 август куни Украина Президенти Владимир Зеленский Украина Ҳаво кучлари қўмондони Микола Олешукни ишдан бўшатган эди. Унинг ўрнини генерал-лейтенант Анатолий Кривоножко қўмондон вазифасини бажарувчи сифатида эгаллади.