Украина яна “Яндекс”нинг дата-марказига зарба берди

Украина дронлари бугун, 9 октябрга ўтар кечаси “Яндекс”нинг Калугадаги дата-марказига ҳужум қилди. Бу ҳақда компания матбуот хизмати хабар берди.

“Дата-марказнинг бир нечта модуллари бутунлай ишдан чиқди. Шу сабабли хизматларнинг бир қисми узилишлар билан ишлаши мумкин. Ҳозирда етказилган зарарнинг тўлиқ кўлами баҳоланмоқда”, дейилади хабарда. 

Компания, шунингдек, ҳужум оқибатида жабрланганлар йўқлигини маълум қилди. “Яндекс”нинг Калугадаги дата-маркази “Грабцево” индустриал паркида жойлашган. У компаниянинг энг кучли дата-маркази ҳисобланиб, 130 минг квадрат метр майдонни эгаллайди ва ички хизматларга хизмат кўрсатади.

Эслатиб ўтамиз, бу сўнгги сутка ичида Украина Қуролли кучлари ҳужумига учраган “Яндекс”нинг иккинчи дата-маркази. Кеча, 8 октябрь куни Украина дронлари компаниянинг Рязань вилояти Сасово шаҳридаги дата-марказига зарба берган эди. Ҳужумдан сўнг объектда ёнғин чиқди ва унинг фаолияти бутунлай тўхтатилди. Кейинчалик “Яндекс” ускуналарни қайта тиклаш имкониятини тасдиқлай олмади. Шу билан бирга, ушбу дата-марказда “Яндекс” ўз YandexGPT сунъий интеллект моделини ўқитиш учун фойдаланадиган учта суперкомпьютеридан иккитаси жойлаштирилган эди.

Маълумот учун, “Яндекс”да жами бешта дата-марказ мавжуд. Улардан тўрттаси Россия ҳудудида – Сасово, Калуга, Митиши ва Владимирда, биттаси эса Финляндияда жойлашган. Охирги объект санкциялар сабабли электр энергиясидан узиб қўйилган. Бир кун аввал “Яндекс” ўзининг харита хизматида дата-марказларнинг кўринишини чеклаб қўйди. Хусусан, сунъий йўлдош тасвирларида тўртта объектнинг аниқ тасвирлари кўринмай қолди. Бундан ташқари, компания энди майдончаларни уларнинг манзиллари бўйича дата-марказ сифатида идентификация қилмаяпти.

Сасоводаги дата-марказга қилинган ҳужумдан сўнг интернетнинг Россия сегментида кенг кўламли узилиш юз берди. “Сбой.рф” ва Downdetector мониторинг порталлари маълумотларидан кўринишича, носозликлар Т-банк, МТС-банк, Совкомбанк ва Альфа-банк, “Авито”, РЖД (Россия темир йўллари), “Пятёрочка”, “Лента”, “Магнит”, DNS ва бошқаларнинг хизматлари ва сайтларига таъсир кўрсатди. 9 октябрь эрталабига келиб, хизматлар ва сайтларнинг бир қисми узилишлар билан ишлашда давом этмоқда.