Украина Россиянинг 2800 км ичкарисидаги заводга зарба берди

Россиянинг Новий Уренгой шаҳридаги саноат объекти Украина дронлари ҳужумига учради. Бу ҳақда Ямал-Ненец автоном округи губернатори Дмитрий Артюхов маълум қилди.

Унинг сўзларига кўра, саноат объектига қилинган ҳужум қайтарилган, бироқ дрон парчаларининг тушиши ёнғинга олиб келган. Ҳалок бўлганлар ва жабрланганлар йўқ. Россия Президентининг Урал федерал округидаги ваколатли вакили Артем Жога ёнғин ёнилғи-энергетика мажмуаси объекти ҳудудида содир бўлганини ва унинг ходимлари эвакуация қилинганини билдирган. У содир бўлган воқеани Урал федерал округининг Арктика қисмига қилинган биринчи ҳужум деб атаган.

Тахмин қилинишича, бу кенг кўламли уруш бошланганидан бери нишоннинг чегарадан узоқлиги бўйича Украина ҳудудидан берилган энг узоқ масофали зарба. OSINT-таҳлилчилари ҳужум нишони деб атаган завод Украинадан тахминан 2800 км узоқликда жойлашган. Бу илгари ҳужумга учраган Омск нефтни қайта ишлаш заводидан (НҚИЗ) деярли 500 км узоқроқда. Дроннинг учирилган жойи ҳозирча номаълум, шу сабабли рекорд ҳақидаги хулоса дастлабки тахмин бўлиб турибди. 

Жорий йилнинг июль ойи бошида Омск НҚИЗга берилган зарбани Украина Махсус амалиёт кучлари кенг кўламли босқин давридаги энг узоқ масофали зарба деб атаган. “Fire Point” компанияси бош конструктори Денис Штилерман июль ойидаги зарба учун FP-1 дронидан фойдаланилганини айтган. Новий Уренгойга ҳужум қилган дрон тури ҳокимият органларининг расмий хабарларида кўрсатилмаган.

“Dnipro Osint” лойиҳасининг маълум қилишича, Новий Уренгойдаги конденсатга транспортировкага тайёрлаш заводи ҳужум нишони бўлган.

Эслатиб ўтамиз, аввалроқ Россия Қуролли кучлари Харьков вилоятида Украина қўшинларининг ҳарбий техникаларига дронлар орқали зарба бергани ҳақида хабар қилинган эди.