Трампнинг янги “бизнеси” можарога сабаб бўлди

Американинг The Intercept нашри ва Freedom of the Press Foundation (FPF) нотижорат ташкилоти АҚШ Президенти Дональд Трамп устидан судга даъво аризаси киритди. Бу ҳақда CNBC хабар берди.

Маълум қилинишича, даъвогарлар Трампнинг Truth Social ижтимоий тармоғидаги постларига бошқалардан олдин кириш имконини берувчи пуллик Truth API хизматини тўхтатишни талаб қилмоқда.

Даъво аризасида айтилишича, Truth API хизмати АҚШ Конституциясининг биринчи ва бешинчи тузатишларини бузади. Чунки, ушбу хизмат обуначиларга Дональд Трамп ҳамда бошқа юқори мартабали амалдорларнинг оммавий баёнотлари ва постларини оддий фойдаланувчилардан олдин кўриш имконини беради.

Даъвогарларнинг сўзларига кўра, Трамп 2025 йил январь ойида Оқ уйга қайтганидан буён Truth Social’да 9 мингдан 11 мингтагача пост эълон қилган. Айрим ҳолларда Трампнинг Truth Social’даги постлари бўйича Оқ уй алоҳида расмий баёнот бермайди.

“Бошқача айтганда, Президент Трампнинг постлари ҳукуматга оид расмий янгиликларни олишнинг ягона усулига айланиб қолмоқда”, дейилади даъво аризасида.

Truth Social’нинг бош компанияси бўлган Trump Media & Technology Group (TMTG) Truth API хизматини жорий йилнинг июль ойи охирида ишга туширган. Хизматга обуна нархи ойига 100 минг долларгача этиб белгиланган. Компания маълумотига кўра, обуначилар Трамп ва унинг яқинларининг янги постларини оддий фойдаланувчилардан бир неча миллисония олдин кўриш имкониятига эга бўлади.

Даъвогарларнинг фикрича, бу имконият, айниқса, молиявий бозорларда фаолият юритувчи компаниялар учун катта устунлик яратади. Чунки Трампнинг айрим баёнотлари фонд бозорларига сезиларли таъсир кўрсатиши мумкин.

TMTG бош директори вазифасини бажарувчи Кевин МакГерннинг маълум қилишича, Truth API хизматига аллақачон 10 дан ортиқ мижоз обуна бўлган. Уларнинг аксарияти фонд ва молиявий бозорларда юқори тезликдаги савдо операциялари билан шуғулланувчи компаниялардир. Шунингдек, сунъий интеллект соҳасидаги бошқа потенциал мижозлар билан ҳам музокаралар олиб борилмоқда.

Даъвогарлар Truth API’ни “коррупцион ва Конституцияга зид схема” деб атаган. Уларнинг фикрича, президентнинг оммавий баёнотларига пул эвазига имтиёзли кириш ҳуқуқини сотиш АҚШ қонунчилигига мос келмайди.

Мазкур ҳолат Дональд Трампнинг манфаатлар тўқнашуви ҳақидаги баҳсларни ҳам кучайтирган. Сабаби Трамп Truth Social’га эгалик қилувчи TMTG компаниясининг энг йирик акциядори ҳисобланади. Шу боис танқидчилар президентнинг расмий баёнотлари тижорий маҳсулотга айлантирилаётгани ҳақида хавотир билдирмоқда.

Эслатиб ўтамиз, аввалроқ Америка Президенти Дональд Трамп учинчи муддатга АҚШ Президенти лавозимига номзодини қўйишни хоҳлашини айтганди, бироқ мамлакат қонунлари бу борада жуда қатъий.