Трампнинг ашаддий танқидчиси жинсий зўравонликда айбланди

АҚШ Федерал тергов бюроси (FBI) собиқ демократ конгрессмен Эрик Сволуэллнинг Вашингтондаги уйида жинсий ноўрин хатти-ҳаракатлар ҳақидаги тергов доирасида тинтув ўтказди. Бу ҳақда терговдан хабардор манбага таяниб “Reuters” хабар берди.

Манбанинг маълум қилишича, FBI агентлари Сволуэллдан Сан-Франциско халқаро аэропортида электрон қурилмаларини олиб қўйган ва ўтган ҳафта охирида унинг Вашингтондаги уйини тинтув қилган. Сиёсатчининг адвокати ҳозирча изоҳ бериш сўровига жавоб қайтармаган.

Сволуэлл апрель ойида Конгрессдаги мандатидан воз кечган ва Калифорния губернатори лавозими учун сайловда иштирок этишдан ҳам бош тортган. Бунга 4 нафар аёлнинг унга нисбатан жинсий зўравонликдан тортиб, розиликсиз интим суратлар юборишгача бўлган айбловларни илгари сургани сабаб бўлган.

Сволуэлл ўзининг “нотўғри қарорлар”и учун узр сўраган, аммо унга қўйилган айбловларни рад этиб, уларга қарши курашишини билдирган. Нью-Йорк ва Лос-Анжелесдаги маҳаллий ҳуқуқ-тартибот идоралари ҳам унга қўйилган жинсий зўравонлик айбловлари бўйича текширув бошлаган.

Бундан ташқари, АҚШ Миллий хавфсизлик вазирлиги Сволуэлл бразилиялик энагогани қонунга хилоф равишда ишга ёллагани ҳақидаги даъволарни ҳам ўрганган. 

Маълумот учун, Сволуэлл 2012 йилда илк бор Конгрессга сайланган ва Президент Дональд Трампнинг ашаддий танқидчиларидан бири сифатида миллий миқёсда танилган. У 2019 йилда президентликка номзодини ҳам қўйган, шунингдек, жорий йилда Калифорния губернаторлиги учун сайловда асосий даъвогарлардан бири ҳисобланган.

Эслатиб ўтамиз, аввалроқ Россиянинг либерал “Яблоко” партияси юқори лавозимли аъзоси Лев Шлосберг Украинадаги урушни қоралагани учун 11 йил 1 ойга ахлоқ тузатиш колониясига ҳукм қилинганди.