Трамп йўлбарсга ем бўлган йигитни масхара қилди (видео)

Жорий йилнинг 10 октябрь куни Буюк Британиянинг Донкастер шаҳридаги табиат боғида Олтой лақабли Амур йўлбарси катакка кириб олган эркакка ҳужум қилди. Оқибатда 23 ёшли Уильям Чепмен ҳалок бўлди. Бу ҳақда “Dail Mail” хабар берди.

Қайд этилишича, гувоҳларнинг уни тўхтатишга уринишларига қарамай, эркак мустақил равишда йўртқич ҳайвон катагига кириб олган. Фожиа Донкастер шаҳри яқинидаги “Yorkshire Wildlife Park” боғида юз берган.

Гувоҳларнинг сўзларига кўра, 23 ёшли Уильям Чепмен Олтой лақабли сибир йўлбарси вольери ёнидаги кузатув кўпригида бўлган. Ҳодисадан бироз аввал у қулоқчинларда рақс тушган ва ташриф буюрувчи аёллардан биридан уни ҳайвон фонида суратга олишини сўраган. Сўнг эркак йўртқич ёнига тушишга ҳаракат қилган. Аёллардан бири уни ушлаб қолишга уринган, аммо у юлқиниб чиқиб, тўрт метр атрофидаги баландликдан вольер ичига сакраган.

Дастлаб йўлбарс унинг атрофида айланиб юрган, шундан сўнг унга ташланиб, бўйнидан тишлаб олган. Зоопарк ходимлари овоз чиқарувчи мосламалар ёрдамида ҳайвонни чўчитиб ҳайдашга уринган. Гувоҳларнинг айтишича, бешта баланд ўқ овози эшитилган.

Воқеа жойига иккита тез ёрдам бригадаси ва санитария вертолёти етиб борган. Тиббиёт ходимларининг ҳаракатларига қарамай, эркак олган жароҳатлари оқибатида вафот этган. Ҳодисадан сўнг ташриф буюрувчилар эвакуация қилиниб, зоопарк ёпилган. Полиция фожиа тафсилотларини аниқламоқда ва ҳужум тасвирланган видеозаписларни тарқатмасликка чақирмоқда. “Yorkshire Wildlife Park” маъмурияти Алтай лақабли йўлбарс жароҳат олмаганини ва уни ўлдириш режалаштирилмаганини маълум қилган.

Ушбу фожиадан уч кундан сўнг, жорий йилнинг 13 октябрь куни АҚШ Президенти Дональд Трамп Truth Social ижтимоий тармоғида мазкур ҳужум акс этган кадрларни улашган. У постга “Табиат билан асло ўйнашманг!” деган изоҳ қолдирган.

Кейинроқ Трамп сунъий интеллект ёрдамида ясалган бошқа бир роликни ҳам жойлаштирган. Унда Президентнинг ўзи майсазорда йўлбарс билан юмалаб ўйнаётгани, сўнг уни қучоқлаб олгани тасвирланган.

Трампнинг ушбу постлари марҳумнинг яқинларида норозилик уйғотган. Улар ижтимоий тармоқларда “ўта ҳақоратомуз контент” тарқатилиши ўзларига оғир ботаётганини билдириб, бундай материалларни тарқатишни тўхтатишни сўраган. Полиция ҳам ҳужум акс этган видеони тарқатмасликка чақирган.

Марҳумнинг яқинлари Уильям Чепменни самимий, меҳрибон ва очиқкўнгил йигит сифатида эслайди. У кўп йиллардан буён оғир руҳий касалликдан даволаниб, кучли таъсир қилувчи дори-дармонларни қабул қилиб келган.

“The Guardian” нашрининг ёзишича, фожиа содир бўлган боғ ҳали ҳам томошабинлар учун ёпиқ. Маъмурият эса одамга ҳужум қилган йўлбарс ўлдирилмаслигини маълум қилган.

Маржона Маманиёзова