Трамп унга Нобелни бермаган Норвегияни “жирканч мамлакат” деб атади

АҚШ Президенти Дональд Трамп Нобель тинчлик мукофотини олмагани сабаб Норвегияни ҳақоратли сўзлар билан атаб, мамлакат фуқароларининг АҚШга киришига қарши эканини айтди. Бу ҳақда “Reuters” хабар берди.

Қайд этилишича, Трамп жорий йилнинг 25 октябрь куни Мичиган штатидаги Порт-Ҳурон шаҳрида республикачиларни қўллаб-қувватлаш учун ўтказилган сиёсий митингда Норвегияни “жирканч мамлакат” деб ҳақорат қилган. У Норвегияни инглиз тилида қўпол ибора билан атаб, мамлакатдан АҚШга муҳожирлар келишини истамаслигини билдирган.

Трамп Франциядаги сўнгги тартибсизликларни ҳам муҳожирлик билан боғлаган. У айрим мамлакатлардан келган муҳожирларни қабул қилишга тайёрлигини айтган, бироқ Норвегиядан келувчиларга нисбатан бундай муносабатда бўлмаслигини билдирган. Бунга Нобель тинчлик мукофоти унга берилмаганини сабаб қилиб кўрсатган.

Шу билан бирга, Трамп маъмурияти Норвегия фуқароларининг АҚШга киришига нисбатан янги расмий чеклов жорий этишни режалаштираётганига оид маълумот йўқ.

Норвегия Ташқи ишлар вазири Эспен Барт Эйде мамлакатнинг NRK миллий телеканалига берган изоҳида Нобель қўмитаси мустақил ташкилот эканини таъкидлаган. Унинг айтишича, бу ҳақда АҚШ томонига аввал ҳам эслатилган ва қўмитанинг мустақил мақоми ўзгармаган.

Маълумотларга кўра, Трамп аввал ҳам Гаити, Ливия, Сомали ва Яман каби мамлакатларга нисбатан шунга ўхшаш ҳақоратли ибораларни ишлатган. У жорий ой бошида Нобель тинчлик мукофоти унга берилмаганини Норвегия учун ўчмас доғ деб атаган эди.

Норвегия аҳоли жон бошига ялпи ички маҳсулот кўрсаткичи бўйича дунёнинг юқори даромадли мамлакатлари қаторига киради. Мамлакатнинг суверен инвестиция жамғармаси жорий йилнинг биринчи ярмида 1,75 триллион норвегия кронаси тахминан 184,3 миллиард доллар миқдорида рекорд фойда қайд этган.

Эслатиб ўтамиз, аввалроқ Дональд Трамп Бразилияда бўлиб ўтган президентлик сайловларини танқид қилиб, уларнинг натижалари сохталаштирилган сайловни эслатганини айтган эди.